खोज

सुर्खेत, ६ वैशाख ।

दैलेखकी भिमा गुरुङका आफन्तले न्याय नपाएको भन्दै शव बुझ्न मानेका छैनन् । अस्पतालको लापरबाहीले भीमाको ज्यान गएको भन्दै उनीहरुले एक साता बित्दा सम्म पनि शव उठाएका छैनन् । पाठेघर सफा गर्न पुगेकी दैलेखको आठबीस नगरपालिका–५, पिपलकोटकी २२ वर्षीया गुरूङको उपचारका क्रममा मृत्यु भएपछि आफन्तहरू अस्पतालको लापरबाही रहेको भन्दै एक सातादेखि आन्दोलित बनेका छन् ।

हिँडेर प्रदेश अस्पताल पुगेकी गुरुङको मृत्यु भएपछि उनका आफन्तले शव उठाउन मानिरहेका छैनन् । आफन्तले भिमाको शव अस्पतालमै छाडेर घर फर्किएका छन् ।

भीमाको सात महिनाको बच्चा छ । सोही कारण आमाको मृत्यु भएपछि आफन्तहरूले नाबालकको पालनपोषणका लागि उचित राहत, परिवारका सदस्य मध्ये एक जनालाई रोजगारी, बालिकाको पठनपाठनको ग्यारेन्टी र घटनाको उच्चस्तरीय छानबिन समिति गठनको माग राखेर शान्तिपूर्ण आन्दोलन जारी राखेका थिए ।

भीमा चैत २८ गते बुधबार कर्णाली प्रदेश अस्पतालमा उपचारका लागि पुगेकी हुन् । २९ गते बिहीबार बिहानै भीमा प्रदेश अस्पताल भर्ना भएकी थिइन् । पाठेघर सफा गर्दैगर्दा केही समयपछि अस्पतालले उनलाई एक्कासी मृत घोषणा गरेको भीमाका श्रीमान नवराज बलामीले जानकारी दिए । भीमाले स्थानीय क्लिनिकमा उपचार गर्दा पाठेघरमा समस्या देखाएको थियो । उक्त क्लिनिकले भीमालाई प्रदेश अस्पताल रिफर गरेको थियो । पाठेघरको उपचार गर्न अस्पताल गएकी भीमाको उपचारका क्रममा मृत्यु भएपछि आफन्तले आन्दोलन गर्दै आएका छन् । परिवारलाई भेट्नै नदिई एक्कासी रगत अभाव भयो भन्दै रगत मगाउने गरेको र केही समयमै मृत घोषणा गरेको आफन्तले बताएका छन् । यता अस्पतालले भने आफ्नो धारणा सार्वजनिक गरेको छैन ।