खोज

सुर्खेत, १६ चैत ।

कोहलपुर–सुर्खेत एक सय ३२ केभी प्रसारण लाइन विस्तार गर्न रुख कटान प्रक्रिया सुरु भएको छ ।रुख कटानका लागि छपान कार्य सकिएको आयोजनाले जनाएको छ । कर्णालीको विद्युतीकरणमा सुधार ल्याउने उद्देश्यले विद्युत प्रसारण लाईन निर्माण कार्य थालिएको हो ।

आयोजनाले विद्युत् प्रसारण लाइन अन्तर्गत राष्ट्रिय निकुञ्जमा पर्ने छ हजार दुई सय ३६ रुख काट्ने अनुमति पाएसँगै निर्माणको बाटो खुलेको छ । वि.सं २०७९ असार १५ गते बसेको मन्त्रिपरिषद्को बैठकको निर्णयले राष्ट्रिय निकुञ्ज क्षेत्रमा पर्ने रुख कटान अनुमति दिइएको थियो । सोही अनुमति अनुसार रुखमा छपान कार्य सकिएको आयोजना प्रमुख रवि चौधरीले जानकारी दिए । विद्युत् विस्तारका लागि बाँके र बर्दिया राष्ट्रिय निकुञ्ज क्षेत्रमा पर्ने रुख कटान गरिने भएको छ ।

सरकारले रुख कटानका लागि दिइएको अनुमति र आयोजनाले गरेको रुख छपानको विवरण राष्ट्रिय निकुञ्ज तथा वन्यजन्तु संरक्षण विभागमा पेस गरिएको चौधरीले बताए ।

बाँके राष्ट्रिय निकुञ्जमा दुई हजार नौ सय १६ र बर्दिया राष्ट्रिय निकुञ्जका तीन हजार तीन सय २० रुखमा छपान सकिएको आयोजनाले बताएको छ । सरकारले बाँके र बर्दिया राष्ट्रिय निकुञ्ज क्षेत्रमा पर्ने छ हजार दुई सय ३६ रुख कटान अनुमति दिइएको हो । अहिले ती रुखमा छपान गरेर विभागमा विवरण पेस गरिएको छ । विवरण प्रमाणित भएर आए लगत्तै अबको केही दिनमा रुख कटानको काम हुने चौधरीले बताए ।

विद्युतको प्रसारण लाइन विस्तारका लागि भारतीय निर्माण कम्पनी आरएस इन्फ्राप्रोजेक्ट प्रालिले ठेक्का लिएको छ । विद्युत प्रसारण लाइन विस्तारको लागि कम्पनीले ७० करोडमा ठेक्का लिएको छ ।

२०७७ असारदेखि लाइन विस्तारको काम सुरुवात गरिएको आयोजनाको ७० प्रतिशत प्रगति हासिल भएको जनाएको छ । यही चैत मसान्तमा आयोजनाको सम्झौता सकिँदै रहेकाले छ महिना म्याद थप गरेर आयोजनाको काम अघि बढाइने जनाइएको छ । हालसम्म आयोजनाले एक सय पाँच फाउण्डेशन निर्माण गरेको छ । यस्तै, २२ किलोमिटर तार तान्ने काम सकिएको छ । सुर्खेतको सुब्बा कुनामा सब–स्टेसन निर्माणको काम अन्तिम चरणमा पुगेको छ ।