खोज

बुटवल, ४ चैत ।

लुम्बिनी प्रादेशिक अस्पतालमा एमआरआई मेसिन खरिदमा चलखेल बढेको छ । अघिल्लो आर्थिक वर्षमा विवादकै बिच टेण्डर भए पनि रकम अभावले रोकिएको मेसिन खरिदमा फेरि चलखेल सुरु भएको छ ।

यो आर्थिक वर्षमा प्रदेश सरकारबाट मेसिन खरिदका लागि १७ करोड रुपैयाँ बजेट बिनियोजन भएको छ । अस्पतालमा सामान खरिदका लागि तोकिएकै कम्पनीलाई बुझाउन स्पेशिफिकेशन मिल्ने गरी करारका चिकित्सकबाट हस्ताक्षर गरी काम अघि बढाइएको छ । मेसिन खरिद टेन्डरको काम विधि मिचेर अगाडि बढेपछि अस्पतालमा चिकित्कसहरु बिचमा नै विवाद बढेको छ ।

प्रमुख कन्सल्टेन्स रेडियोलोजिष्ट डा सुरेश थापालाई कुनै जानकारी बिना नै अस्पतालका मेसु डा. सुदर्शन थापाले काम अघि बढाएपछि विवाद चुलिएको छ । मेसु थापाले आफू अनुकुलको करारको चिकित्सक डा. प्रशान्त आचार्यलाई प्रयोग गरेका छन् । अस्पतालमा पटकपटक नयाँ सामान खरिद गर्दा विधि र आवश्यकताको आधारमा भन्दा पनि कमिशनको चलखेलमा ल्याउने गरिएको श्रोतको दाबी छ । मेशिन खरिद चलखेलमा केही राजनीतिक दलका नेताहरु पनि लागेको श्रोत बताउँछ । ‘फिलिप्स कम्पनीको मेसिन भित्र्याउने गरी सप्लायर्ससंग आन्तरिक रुपमा चलखेल भएको छ’—नाम नबताउने शर्तमा एक कर्मचारीले भने । सरकार परिवर्तनसंगै छिटोभन्दा छिटो टेन्डरको काम सक्ने गरी काम अघि बढेको उनको दाबी छ । विज्ञ समिति गठन गर्नुपर्ने प्रावधान रहेको भए पनि त्यसलाई वास्ता गरिएको छैन । विवाद बढेपछि टेन्डर विज्ञापनको काम रोकिएको छ ।

अघिल्लो वर्ष अस्पतालमा मेसु डा ईन्द्र ढकालको पालामा प्रदेश सरकारबाट १३ करोड रुपैयाँमा एमआरआई मेसिन टेन्डर भएको थियो । अन्तर्राष्ट्रिय बजारमा डलरको मूल्य बढेपछि बजेट अभावकै कारण टेन्डर भएपछि रोकिएको थियो ।

डा. प्रशान्त आचार्यले आफुले स्पेशिफिकेशन मिल्ने गरी अस्पतालमा मेसु डा सुदर्शन थापाको निर्देशनमा हस्ताक्षर गरेको बुटवल टुडेसंग स्वीकार गरे । ‘अन्जान बस हस्ताक्षर गरे’—उनले भने । यो विषयमा डिटेल बुझेपछि आफु पछि हटेको उनले बताए । प्रदेश स्वास्थ्य मन्त्रालयका सचिवलाई यो विषयमा आफ्नो असहमति बताएपछि प्रक्रिया रोक्ने प्रतिवद्धता पाएको उनले बताए । यता अस्पतालका मेसु डा सुदर्शन थापासंग सम्पर्कको प्रयास गर्दा फोन सम्पर्क हुन सकेन ।