खोज

बुटवल, २ चैत ।

उपप्रधान एवं भौतिक, योजना तथा निर्माणमन्त्री रघुविर महासेठले शुक्रबार सिद्धबाबा सुरुङमार्गको अनुगमन गरेका छन् ।

सुरुङमार्गको अनुगमनका क्रममा उनले हालसम्म भएको भौतिक प्रगतिको बारेमा जानकारी लिंदै २०८३ सालभित्रै सुरुङ मार्ग निर्माण गरिसक्न निर्माण कम्पनीलाई आग्रह गरे । उनले यसका लागि बजेटको अभाव हुन नदिने पनि बताए ।

सिद्धबाबा सुरुङमार्ग निर्माणले पछिल्लो ६ महिनायतो गति लिएको छ । ७ अर्ब ३४ करोड २१ लाख रूपैयाँको लागतमा बन्ने सुरुङ मार्ग चाइना स्टेट कन्स्ट्रक्सन इन्जिनियरिङ कर्पोरेसनले निर्माण गरिरहेको हो । दुई महिनादेखि रातको समयमा सिद्धार्थ राजमार्गमा गाडीको आवागमन बन्द गरेर काम अघि बढाइएको छ ।

हालसम्म सिद्धबाबा मन्दिर साइटतर्फ मात्रै करिब ३५ मिटर सुरुङ खनिएको छ । अर्कोतर्फको साइटमा सुरुङ परिसरलाई व्यवस्थित बनाउने काम सकिएपछि अर्को सातादेखि खन्ने काम सुरु हुने आयोजनाले जनाएको छ । सुरुङसँगै तीन ठाउँमा आपतकालीन मार्गसमेत खनिएको छ ।

आयोजनाकी इन्जिनियर सविता ज्ञवालीले अहिलेसम्म १७ प्रतिशत भौतिक प्रगति भएको र कामले रफ्तार लिएको बताइन । उपकरण, कामदार, साइट क्लियरदेखि बजेटसम्मको सबै प्रबन्ध ठीकठाक चलिरहेको उनको भनाइ छ ।

कार्यस्थलमा खटिएका साइट इन्जिनियर रितेश पौडेल र सिनियर सर्भेयर मोहन बोहोरासहितको प्राविधिक टोली सुरुङ निर्माणस्थलमा नियमित खटिएको छ । उनीहरुका अनुसार त्यहाँ चिनियाँमात्रै ३५ जना इन्जिनियर खटिएका छन । त्यस्तै १०० जना नेपाली प्राविधिकले नियमित काम गरिरहेका छन ।

गएको १० वर्षमा सिद्धबाबा खण्डमा पहिरो खस्दा र दुर्घटना हुँदा ७० जनाभन्दा बढीको मृत्यु भएको सरकारी तथ्यांक छ । लामो समयको छलफल र बहसपछि सिद्धबाबामा सुरुङ मार्ग निर्माण आयोजना कार्यान्वयनमा आएको थियो । सुरुङ मार्ग बनेपछि र बाँकी खण्ड पनि फराकिलो भएपछि यस खण्डमा ढुक्कसँग हिँडडुल गर्न सकिने स्थानीयको विश्वास छ ।