खोज

बुटवल, २० फागुन ।

यही फागुन २८ र २९ गते लुम्बिनीमा विवादकै विचमा हुन लागेको ‘अन्तराष्ट्रिय लौरिएट्स एण्ड लिडर्स शिखर सम्मेलन’ रोक्न नेकपा एमालेले माग गरेको छ । एमालेबाट निर्वाचित प्यूठानका संघीय सांसद एवं पार्टीका पोलिटब्यूरो सदस्य सूर्य थापाले संघीय संसदमा विशेष समय माग गर्दै लुम्बिनी प्रदेश सरकारले गर्न थालेको उक्त सम्मेलन रोक्न माग गरेका हुन् ।

अन्तर्राष्ट्रिय स्तरका सम्मेलन गर्ने क्षेत्राधिकार प्रदेश सरकार अन्तर्गत नरहेको बताउँदै थापाले लुम्बिनी प्रदेश सरकारले विवादित छविका दलाई लामालाई बोलाएर देशलाई द्वन्द्वमा झोस्न खोजेको आरोप लगाए । ‘मार्च १० तारिखका दिन दलाई लामाले चीन विरुद्ध तिब्बतमा विद्रोह शुरु गरेको दिनलाई सम्झेर शिखर सम्मेलन गर्ने प्रदेश सरकारको तयारी रहेछ’, नेता थापाले भने, ‘तर, यसबारे चौतर्फी विरोध भएपछि मार्च १० तारिख हटाइएको छ । यो सम्मेलन देशको हितमा छैन ।’

उनले पवित्र शान्तिभूमी लुम्बिनी प्रदेशकै मात्र नभएर राष्ट्रिय तथा अन्तर्राष्ट्रिय सम्वन्धसँग पनि जोडिएको विषय भएकाले प्रदेश सरकारको ‘तजविजको’ मात्र कुरा नरहेको उल्लेख गरे । यस्ता कार्यक्रमको आयोजना संघीय सरकार र परराष्ट्र मन्त्रालयको सहभागितामा गर्नुपर्ने उनको तर्क थियो ।

‘प्रदेशमा परराष्ट्र मन्त्रालय नै छैन्, के को अन्तर्राष्ट्रिय सम्मेलन ?’, थापाले प्रश्न गर्दै भने, ‘यो सम्मेलनको बारेमा शंका गर्ने धेरै विषय छन् । लुम्बिनी प्रदेश सरकारले नेपाललाई सामरिक द्वन्द्वमा फसाउन खोजेको प्रष्ट हुन्छ ।’ उनले विवादित छविका दलाई लामालाई नै केन्द्रित गरेर सम्मेलन गर्न खोजेको समेत आरोप लगाए ।

संयूूक्त राष्ट्रसंघको वडापत्र, सार्क घोषणापत्र, पंचशिलको सिद्धान्त र नेपालको घोषित परराष्ट्र नीति विपरितका गतिविधि नगर्न समेत उनले प्रदेश सरकारलाई चेतावनी दिए । ‘यसबारे प्रधानमन्त्रीसँग प्रश्न मागिएको छ, तर जवाफ आएको छैन’, थापाले भने, ‘तर, मुख्यमन्त्रीसँग जवाफ माग्ने यो विषय नै होइन ।’ उनले शान्तिभूमी लुम्बिनी क्षेत्रलाई अहिंसाको बाटोमा नलैजान समेत प्रदेश सरकारलाई सुझाव दिए ।

शिखर सम्मेलनबारे लुम्बिनी प्रदेशसभामा समेत आइतवार एमाले सांसदहरुले विरोध जनाएका छन् । बैठकमा विरोध गर्ने भएपछि मुख्यमन्त्री डिल्ली बहादुर चौधरी प्रश्नको जवाफबाट भागेको एमालेका सांसदहरुले आरोप लगाए ।