खोज

दाङ, १६फागुन ।

तुलसीपुर उपमहानगरपालिकाले आधुनिक बधशाला निर्माणका लागि प्रारम्भिक चरणको छलफल सुरु गरेको छ । उपमहानगरपालिकाले पश्चिम क्षेत्रका चार पालिका (तुलसीपुर, शान्तीनगर, दंगीशरण र बबई) को सहकार्यमा बधशाला निर्माणका लागि पालिकास्तरीय छलफल गरेको छ ।

तुलसीपुर उपमहानगरपालिकाका नगरप्रमुख टीकाराम खड्काले तुलसीपुर उपमहानगरपालिका वडा नम्बर १६ मा पालिकाले निर्माण गर्न थालेको औद्योगिक ग्राम निर्माण स्थलभित्रै बधशाला बनाइने बताए । उनले स्वस्थ मासु खान पाउने उपभोक्ताको अधिकार सुनिश्चित गर्नका लागि उपमहानगरपालिकाभित्र आधुनिक बधशाला अनिवार्य रहेको बताए । उनले तीन तहकै सरकार, व्यवसायी र पशुपालक किसानसँगको संयुक्त सहकार्यमा बधशाला निर्माण गरिने बताए । नगरप्रमुख खड्काले बधशालाका लागि आवश्यक पर्ने पूर्वाधारको व्यवस्था गरिने बताए ।

दंगीशरण गाउँपालिकाका अध्यक्ष शम्भु गिरीले आधुनिक बधशाला निर्माणका लागि पालिका सहकार्य गरेर अघि बढ्न तयार रहेको बताए । उनले पालिकाका ग्रामीण क्षेत्रमा रहेको र अधिकांश पशुपालक किसान रहेकाले बजारका लागि आधुनिक बधशाला अनिवार्य रहेको बताए । तुलसीपुरका सामाजिक विकास समितिका संयोजक मानबहादुर रावतले बधशाला निर्माणका लागि प्रक्रिया अघि बढाउनुपर्ने र त्यसमा मासु व्यवसायीहरुको समेत प्रत्यक्ष संलग्नता भए कार्यान्वयन गर्न सहज हुने बताए ।

लेखा समितिका संयोजक घनश्याम ढकालले बजार क्षेत्र बढ्दै गएकाले तीनै तहका सरकारले आधुनिक व्यवस्थित बधशाला अनिवार्य रहेको बताए । तुलसीपुर उपमहानगरपालिका वडा नम्बर १६ का वडाध्यक्ष शिवानन्द डाँगीले आधुनिक बधशाला निर्माणसँगै नजिकका जिल्ला र कर्णाली प्रदेशमा समेत मासु निर्यात गर्न सकिने बताए ।

बधशाला निर्माणका लागि प्राविधिक सहयोग गर्दै आएको हेफर इन्टरनेशनल नेपालका निर्देशक तीर्थराज रेग्मीले यस क्षेत्रमा मात्रै सात हजार बढी व्यवसायिक रुपमै पशुपालक किसान रहेको बताए । उनले करिब साढे सात करोडको लागतमा प्रारम्भिक चरणमा खसी बधशाला निर्माण गर्न सकिने बताए ।

संस्थाले बधशालाको विस्तृत अध्ययन, वातावरणीय प्रभाव मूल्याङ्कन, बधशालामा राखिने उपकरणको प्राविधिक सहयोग गर्ने बताइएको छ । बधशालामा शुरुमा खसी बधको काम अघि बढाइनेछ । लुम्बिनी प्रदेशमा बुटवल उपमहानगरपालिका र कोहलपुर नगरपालिकाले अत्याधुनिक बधशाला निर्माण गरिसकेका छन् । सार्वजनिक, निजी, उत्पादक साझेदारीको संयुक्त लगानीमा बधशाला निर्माण गरिनेछ ।

दाङको पश्चिम क्षेत्रमा अत्याधुनिक बधशाला नहुँदा नागरिकहरु अस्वस्थकर मासु खरिद गर्न बाध्य भएका छन् । विज्ञका अनुसार अत्याधुनिक बधशालामा काटेको निरोगी पशुका मासु गुणस्तर परीक्षण गरी कम्तीमा माइनस १० डिग्री सेल्सियसको तापक्रममा २४ घन्टा डिप फ्रिजमा राख्नुपर्दछ ।

यसरी विधि प्रक्रिया पु¥याएको मासु मात्रै स्वास्थ्यका लागि हितकारक मानिन्छ । वि.सं २०५५ मा बनेको पशु बधशाला तथा मासु जाँच ऐन कार्यान्वयन नहुँदा उपभोक्ताहरु दूषित मासु खान बाध्य छन् । फोहर र दूषित मासुमा साल्मोनेला, इकोलाई जस्ता मानव स्वास्थ्यलाई प्रतिकूल असर गर्ने जीवाणु हुने गर्छ । यसले गर्दा पशुबाट मानिसमा रोग सर्ने र स्वास्थ्यमा असर पार्ने खतरा हुन्छ । अध्ययनबाट मानिसमा सर्ने रोगमध्ये ७५ प्रतिशतको कारण पशुपक्षी र तिनका मासु नै भएको देखिएको छ ।