खोज

सुनवल, १६ फागुन ।

अर्थमन्त्री डा. प्रकाशशरण महतले पश्चिम नवलपरासीको मूल भन्सार, महेशपुर भन्सार नाकाको स्थलगत निरीक्षण गरेका छन् । नेपाल र भारतको सिमावर्ती क्षेत्र महेशपुरको स्थलगत निरीक्षणपछि मन्त्री महतले महेसपुर भन्सार कार्यालयको राजश्व संकलनको अवस्थाका विषयमा जानकारी लिएका हुन् ।

भन्सार कार्यालयबाट अपेक्षित रुपमा राजश्व संकलन हुन नसकेकाले राजश्व संकलनको अवस्था सुधार गर्न मन्त्री महतले कर्मचारीहरुलाई निर्देशन समेत दिए । सिमावर्ती क्षेत्रबाट हुने चोरी निकासी नियन्त्रण गरी प्रहरी प्रशासनसंगको समन्वयमा भन्सारको राजश्व सकंलन वृद्धि गर्न उनले निर्देशन दिएका हुन् । सो क्रममा अर्थमन्त्री महतले महेशपुर भन्सारको पूर्वाधार विकासका लागि छिट्टै प्रक्रिया अगाडि बढाउने बताउँदै महेशपुर नाकाबाट सुरु भएको सडक विस्तारको कार्यका लागि पनि बजेट व्यवस्थापन गर्ने प्रतिवद्धता व्यक्त गरे ।

साथै महेशपुर भन्सारमा आवश्यक एक्जिम कोड, प्लान्ट क्वारेन्टाईनको लगायतका आवश्यक व्यवस्था गर्ने पनि मन्त्री महतले प्रतिवद्धता व्यक्त गरे । सो क्रममा भन्सार कार्यालयका प्रमुख वुद्धिकुमार चुँडालले भन्सारमा प्लान्ट क्वारेन्टाईन लगायतका पूर्वाधार अभावका कारण लक्ष्य अनुरुपको राजश्व संकलन हुन नसकेको बताएका थिए । प्रमुख जिल्ला अधिकारी सुरेश पन्थीले सबै पक्षसंगको समन्वयमा सिमावर्ती क्षेत्रमा निगरानी बढाई सुरक्षा व्यवस्था चुस्त दुरुस्त बनाएको बताए । सो क्रममा पुर्वगृहराज्य मन्त्री देवेन्द्रराज कंडेल, प्रदेश सभा सदस्य वैजनाथ कलवार, पाल्हीनन्दन गाउँपालिकाका अध्यक्ष वैजु प्रसाद गुप्ता, उद्योग वाणिज्य महासंघका केन्द्रीय सदस्य केशव भण्डारी लगायतले भैरहवा भन्सारमा भएको बढ्दो चाप नियन्त्रण गर्न महेसपुर भन्सारको पूर्वाधार विस्तार गर्नुपर्नेमा अर्थमन्त्रीको ध्यानार्कषण गराएका थिए ।