खोज

बुटवल, ८ माघ । महिला भलिवल रनिङ शिल्ड प्रतियोगिताको उपाधि एभरेष्ट बोर्डिङ स्कुलले हात पारेको छ । जीपी कोईरालाको १४ औ स्मृति दिवसको अवसरमा जीपी कोईराला स्मृति प्रतिष्ठानद्धारा आयोजित तथा बुटवल उपमहानगरपालिकाको संरक्षणमा भएको महिला भलिबल रनिङशिल्ड प्रतियोगिताको फाइनल खेलमा न्यू होराईजन माविलाई ३–१ को सेटमा पछि पार्दै एभरेष्टले लगातार सातौ पटक रनिङ शिल्ड आफ्नो पोल्टामा पार्न सफल भएको हो । उपाधिसंगै एभरेष्ट नगद २० हजार रुपैयाँ, शिल्ड, मेडल, प्रमाणपत्रबाट पुरस्कृत भएको छ ।
उपविजेता न्यु होराइजन नगद १५ हजार रुपैयाँ, कप, मेडल, प्रमाणपत्रमा चित्त बुझायो ।

प्रतियोगितामा कुँवरवर्ती तृतिय हुँदै नगद १० हजार रुपैयाँ र उजिर सिंह माविले सान्त्वना हुदै नगद ५ हजार रुपैया, मेडल, प्रमाणपत्रबाट पुरस्कृत भयो ।

एक कार्यक्रमका बिच बुटवल उपमहानगरपालिकाकाका नगरप्रमुख खेलराज पाण्डेय, प्रतिष्ठानका अध्यक्ष रामबहादुर कार्की, उपाध्यक्ष काजिमान श्रेष्ठ, प्रतिष्ठानका महासचिव तथा कार्यक्रम संयोजक परमानन्द भट्टराईले विजेता,उपविजेता टिम तथा खेलाडीहरुलाई पुरस्कार वितरण गरेका थिए ।

कार्यक्रममा नगरप्रमुख खेलराज पाण्डेयले खेलकुदको विकासमा नगरबाट ठूलो लगानी भएको दाबी गरे । बुटवललाई खेलको हब बनाउने गरी आफूहरु अगाडि बढेको भन्दै पुर्वाधारसंगै प्रतियोगिताहरुलाई प्राथमिकतामा राखेको बताए ।

ज्ञानोदय माध्यमिक विद्यालयको प्रङ्गढमा भएको प्रतियोगितामा यस क्षेत्रका न्यू होराइजन, पश्चिमाञ्चल स्वास्थ्य विज्ञान प्रतिष्ठान, एभरेष्ट बोर्डिङ्ग, शान्ति नमुना, नविन औद्योगिक, अक्सफोर्ड, सिद्धेश्वर लालकुमारी, न्यु इभाइरन्टमन्ट, उजिर सिंह, नव ज्योती, कान्ति, सिद्धार्थ गौतम बुद्ध क्याम्पस, ज्ञानोदय र कुंवरवर्ति गरी १४ वटा विद्यालयले प्रतिस्प्रर्धा गरेका थिए ।