खोज

बर्दघाट ।
आइसिसी क्रिकेट विश्वकप लिग २ चरण आजबाट सुरु हुँदैछ । एक दिवसीय मान्यता पाएका ८ एशोसिएट देशहरुविचको प्रतियोगिता अन्तर्गत सिजन २ को पहिलो खेलमा नेपाल र नामिविया टियु क्रिकेट ग्राउण्डमा भिडदैछन् ।

नेपाल, नेदरलेण्ड, नामिविया, ओमन, अमेरिका, क्यानाडा, यु ए इ र स्कटल्याण्ड विच लिग २ खेलको तालिका समेत सार्वजनिक भइसकेको छ । लिग २ का सबै खेल सकिँदा शिर्ष ४ टोली आगामी विश्वकप क्रिकेटको छनौट प्रतियोगिताको लागि सिधै प्रतिष्पर्धा गर्नेछन्, यसै कारण पनि लिग २ प्रतियोगिताको सबै १ सय ४४ खेल सकिँदा शिर्ष ४ भित्र समेटिनु विश्वकप छनौटका लागि र एकदिवसीय मान्यता कायम राख्न पनि निकै महत्वपूर्ण छ ।

एक दिवसीय क्रिकेट वरियता क्रमको एसोसियट राष्ट्रहरुमा स्कटल्याण्ड सबैभन्दा अग्रस्थानमा रहेको छ । स्कटल्याण्ड वरियताको ११ औँ स्थानमा रहेको छ । यस्तै नेदरल्याण्ड १४ औँ, नेपाल १५ औँ र नामिविया १६ औँ स्थानमा रहेका छन् । पहिलो श्रृडखलामा १४ औँ, १५ औँ र १६ औँ स्थानमा रहेका टिमविच प्रतिष्पर्धा हुँदैछ ।

नेपाल र नामिविया यसअघि कुल ६ वटा एकदिवसीय प्रतियोगितामा आमने सामने भएका छन् । पछिल्लो वरियता क्रममा नामिविया भन्दा नेपाल एक स्थान माथि रहेपनि कुल खेलिएका खेलहरुमा भने नामिविया भने नेपालमाथि हावी भएको छ ।

नेपाल र नामिविया विच पहिलो खेल लिग २ मा २०२२ मा भएको थियो जसमा नेपाल ४० रनले पराजित भएको थियो । यस्तै दोश्रो खेलमा नेपाल ६३ रनले पराजित भएको थियो । नेपाल र नामिविया विच लिग २ अन्तर्गतकै तेश्रो खेल भने नतिजाविहिन हुन पुगेको थियो । २०२२ कै अन्तिम तथा चौथो खेलमा पनि नेपालले हार ब्यहोरेको थियो ।

२०२२ का प्रतियोगिता नामिवियामा आयोजना गरिएका थिए । सन २०२३ को फेब्रुवरी १४ मा टि यु ग्राउण्डमा भएको प्रतियोगितामा भने नेपालले नामिवियालाई २ विकेटले पराजित गरेको थियो । नेपालका तिव्र गतिका बलर करन केसीले यो खेलमा ५ विकेट लिएका थिए भने कुशल भुर्तेलले १ सय १५ रनको शतकीय पारी खेलेका थिए । कप्तान रोहित पौडेलले ७२ रनको योगदान गरेका थिए । छैटौँ तथा अन्तिम खेल पनि टि यु ग्राउण्डमै सम्पन्न भएको थियो जसमा नेपालले नामिवियालाई पराजित गर्दै एक दिवसिय मान्यता जोगाउन महत्वपूर्ण खेल जितेको थियो ।

छैटौँ खेलमा पनि नेपालले ३ विकेटको जित निकालेको थियो । समग्रमा नेपाल र नामिविया विच सम्पन्न ६ खेलमध्ये नामिवियाले ३ खेलमा जित निकालेको छ भने नेपालले २ खेलमा जित निकालेको छ, एक खेल नतिजा विहिन रहेको छ ।

पछिल्लो समय नेपाली क्रिकेट टोली उच्च मनोवलका साथ खेलिरहेको छ । केही दिन अघि क्यानाडा विरुद्ध तीन एकदिवसीय क्रिकेटमा पाहुना टोलीलाई क्लिन स्विप गरेको नेपाल लिग २ का खेलमा पनि सफलता पाउनेमा विश्वस्त रहेको छ ।