खोज

बुटवल २८ माघ । रुपन्देहीमा जारी नवौं मणिमुकुन्द कप राष्ट्रिय पुरुष भलिबल प्रतियोगिताको आईतबार तेस्रो दिन भएको खेलमा विभागिय टिम त्रिभुवन आर्मी क्लब, नेपाल पुलिस, एपिएफ सहित गण्डकी प्रदेश बिजयी हुदै अंक जोड्न सफल भएका छन । प्रतियोगितामा विभागिय टिमको दबदबा कायमै रहेको छ ।

प्रदेश खेलकुद परिषद लुम्बिनी प्रवर्द्धन र मुख्य प्रायोजन, नेपाल भलिबल संघ संयोजन, तिलोत्तमा नगरपालिका र सहारा ईन्जिनियरिङ प्रालिको विशेष सहयोगमा मणिमुकुन्द भलिबल क्लबले आयोजनामा मणिमुकुन्द भलिबल क्लबको खेलमैदान तिलोत्तमामा पहिलो खेलमा त्रिभुवन आर्मी क्लबले कोशी प्रदेशलाई २५–२०, २५ –१३, २७–२५ को सोझो सेटमा पराजित गरेको छ । खेलमा उत्कृष्ट प्रदर्शन गर्ने त्रिभुवन आर्मीका मनिष मानन्धर म्यान अफ द म्याचबाट पुरस्कृत भए ।

दोस्रो खेलमा विभागिय नेपाल पुलिस क्लबल मधेश प्रदेशलाई २५–२०, २५–११ र २५–१२ को सोझो सेटमा जित निकाल्यो । खेलमा नेपाल पुलिसमा दिपक राज जोशी म्यान अफ द म्याचबाट पुरस्कृत भए । यसैगरि तेस्रो खेलमा पनि विभागिय टिम एपिएफ क्लब २५–२१, २५–२१ र २५–२० को सोझो सेटमा कर्णाली प्रदेशलाइ पराजित गरेको छ । खेलमा एपिएफका बिजय थापा म्यान अफ द म्याचबाट पुरस्कृत भए ।

आईतबारको अर्को खेलमा गण्डकी प्रदेशले र बाग्मती प्रदेशलाई ३–१ को सेटमा जित निकाल्यो । पहिलो सेट बाग्मतीले २५–२३ अंकका साथ जित्दै खेलमा अग्रता लिएपनि त्यसपछि खेलमा फर्केको गण्डकी लगातार २५–१९, २५–२१, २५–२३ अंकसहित ३ सेट नै आफनो पक्षमा बनाएर खेलमा विजयी भयो । गण्डकी प्रदेशका राजन दलार्मी म्यान अफ द म्याचबाट पुरस्कृत भए ।

यसैगरि नेपाल पुलिस क्लबले सुदुरपश्चिमलाई २५–१७, २५–१४ र २५–१९ को अंकका साथ ३–० को सेटमा जित निकाल्यो । नेपाल पुलिस क्लबका रबिन नगरकोटी म्यान अफ द म्याचबाट पुरस्कृत भए । मणिमुकुन्द भलिबल क्लबका अध्यक्ष लोकेन्द्र भन्डारीले खेल पहिलो चरणमा चलिरहेको बताए ।