खोज

बुटवल, २७ माघ । भारतको पुर्वघाट सिद्धार्थनगरलाई हराउदै लुम्बिनी नव युवा क्लब लुम्बिनीमा सम्पन्न ईन्डो नेपाल क्रिकेट प्रतियोगिता २०८० को उपाधि चुमेको छ । प्रदेश खेलकुद परिषद लुम्बिनीको प्रवद्र्धन, लुम्बिनी सास्कृतिक नगरपालिका, लुम्बिनी विकास कोषको सहयोग तथा आयोजक लुम्बिनी नव युवा क्लबको आयोजनामा शनिबार भएको फाईनलमा भारत गोरखपुरका पुर्वघाट सिद्धार्थनगरलाई ५ विकेटले पराजित गर्दै आयोजक लुम्बिनी च्याम्पियन बनेको हो । उपाधिसंगै लुम्बिनीले नगद २ लाख रुपैया, कप, मेडल प्रमाणपत्रबाट पुरस्कृत भएको छ । उपविजेता पुर्वघाट सिद्धार्थनगर भने नगद १ लाख रुपैया, कप, मेडल, प्रमाणपत्रमा चित्त बुझायो ।

लुम्बिनी विकास कोष पडसरीस्थित क्रिकेट मैदानमा टस जितेर ब्याटिङ रोजेको पुर्वघाट सिद्धार्थनगरले निर्धारित १५ ओभरमा १७८ रन तयार गरेको थियो । विशाल लक्ष्यलाई लुम्बिनीले १४.२ ओभरमा ६ विकेटको नोक्सानी भेटायो । फाईनल खेलमा लुम्बिनीका कुले थापाले अन्तिमसम्म लगातार ३ छक्कासहित खेलमा जित निकाल्न महत्वपुर्ण योगदान दिए । उनी खेलमा म्यान अफ द म्याचबाट पुरस्कृत भए ।

ग्रान्ड कास्मो होटल, पिनस सिद्धार्थनगर प्रतियोगिताको सेमीफाईनलमा यात्राबाट बाहिरियो । प्रतियोगितामा अमृत गुरुङले १० विकेट लिदै अलराउण्ड ६६ रन जोड्दै बेष्ट बलर घोषित हुदै नगद ७ हजार रुपैया, कपबाट पुरस्कृत भए । प्रतियोगितामा २६५ रन बनाएका भारत पुर्वघाट सिद्धार्थनगरका रिन्कु यादव बेष्ट ब्याट्सम्यान साथै म्यान अफ द सिरिज बन्दै ७ हजार र १५ हजार रुपैयाको दुबै पुरस्कृत आफनो नाम गरे ।

एक समारोहका बिच प्रदेश खेलकुद विकास परिषदका सदस्य सचिव जयप्रकाश भट्टराई, गौडहवा गाउपालिकाका अध्यक्ष सुरेन्द्र पौडेल, लुम्बिनी सास्कृतिक नगरपालिकाका नगरप्रमुख सजरुद्घिन मुसलमान, उपप्रमुख कल्पना हरिजन, जनमत पार्टी केन्द्रीय सचिव भुपेन्द्र प्रसाद यादव, वडा नं २ का वडाअध्यक्ष नईमुल्ला मु.ले विजेता, उपविजेता टिम तथा उत्कृष्ट खेलाडीहरुलाई पुरस्कार वितरण गरे ।

कार्यक्रममा प्रदेश खेलकुद विकास परिषदका सदस्य सचिव जयप्रकाश भट्टराईले खेलमार्फत लुम्बिनीको पर्यटन प्रवद्र्धन गर्न सकिने भन्दै यसका लागि पुर्वाधार विकासमा सरकार र स्थानिय खेलप्रेमीहरुको ध्यान जानुपर्ने बताए । क्रिकेटप्रतिको माया र मोहलाई बुझ्न सकिने गरि प्रतियोगिता सफल भएको भन्दै अब भने पुर्वाधारमा जोड दिन सुझाव दिए ।

कार्यक्रममा युवा संयोजक वजिउद्घिन खानले क्रिकेटमा लुम्बिनी क्षेत्रको आर्कषणबारे प्रकाश पार्दै रंगशाला बनाउन सरकारबाट आवश्यक सहयोग जरुरी रहेको बताए । लुम्बिनी पहिचान बढाउने गरि जित निकालेको भन्दै खेलाडीको भविष्यप्रति सरकार थोरै भएपनि उत्तरदायी बन्नुपर्ने बताए ।

कार्यक्रममा क्लबका अध्यक्ष अहमद खानले धेरै मेहनत गरेर श्रोत जुटाई पाच वर्षको अन्तरालमा प्रतियोगिता आयोजना गरेको बताए । दर्शकको साथ र माया कै कारण क्रिकेट खेल आयोजना गर्न आफुहरु सफल भएको बताए । माघ १३ गतेबाट शुरु भएको प्रतियोगितामा नेपाल र भारतका १६, १६ गरि ३२ क्लबहरुले भाग लिएका थिए ।