खोज

बुटवल, २५ माघ । बुटवल उद्योग वाणिज्य संघ रुपन्देहीको आयोजनामा हुने विशिष्टिकृत मेलामध्येको प्राङ्गारिक कृषि मेलाको तयारी तिब्र पारिएको छ । विहिबार बस्तुगत समितिसंग छलफल गरि मेलाको तयारीबारे छलफल गरिएको हो । फागुन १० देखि १४ गतेसम्म बुटवलको प्रदर्शनी स्थल बुटवल मण्डपमा प्राङ्गारिक कृषि मृला सञ्चालन गर्ने तयारी रहेको संघका महासचिव मुक्तिप्रसाद अधिकारीले बताए । कृषि मेलालाई व्यवस्थित बनाउनको लागि संघमा गठित बस्तुगत समितिसंग छलफल गरिएको उनले बताए । संघमा २८ वटा बस्तुगत समिति गठन भएका छन् । बस्तुगत समितिका सभापतिहरुले मेलालाई व्यवस्थित र प्रभावकारी बनाउनको लागि कृषि उत्पादन, बजारीकरण, व्यवसायिक खेती प्रणाली, कृषिमा वैज्ञानिकिकरण, प्रविधिका विषयमा ध्यान दिनुपर्ने सुझाव दिएका छन । मेलालाई प्रभावकारी र व्यवस्थित बनाउन बस्तुगत समितिको पूर्ण सहयोग रहने पनि प्रतिवद्धता समेत व्यक्त गरे ।

कार्यक्रममा संघका कार्यवाहक अध्यक्ष टंकप्रसाद गैरेले बिसं २०६२ सालदेखि निरन्तर रुपमा विशिष्टिकृत कृषि मेला आयोजना गर्दै आएको भन्दै कृषिमा व्यवसायिक विकासमा यसले टेवा मिलेको बताए । कृषिको व्यवसायिक विकास तथा कृषिमा आधारित औद्योगिक विकास अबको आवश्यकता भएको बताउँदै कृषिमा सम्भावनाको विकास, युवा आकर्षण, लगानी आकर्षण, प्रविधिको प्रयोग लगायतका कुरालाई प्रथमिकता दिएर प्राङ्गारिक कृषि मेला आयोजना हुने बताए ।

बस्तुगत समिति समन्वय उपसमितिका संयोजक दीप आचार्यले संघको वार्षिक कार्ययोजना अन्तरगत मेला गरिदै आएको बताए ।