खोज

कपिलवस्तु, २३ माघ । कपिलवस्तुको शुद्धोधन गाउँपालिकाका ६ वटा बिद्यालयमा दुई दिने मनोसामाजिक परामर्श तथा लागु औषध दुव्र्यसन बारे सचेतना कार्यक्रम सम्पन्न गरिएको छ । शुद्धोधन गाँउपालिकाको आर्थिक सहयोगमा शुभारम्भ नेपाल काठमाण्डौंले सचेतना कार्यक्रमको आयोजना गरेको हो ।

कार्यक्रममा समुदायमा आधारित आत्महत्या रोकथामका लागि मनोसामाजिक परामर्श सेवा, आत्महत्याको अवस्था र रोकथामका उपाय बारे जानकारी दिईएको थियो । त्यसै गरि लागु औषध दुव्र्यसनको अवस्था, चरण र रोकथामका उपाय बारे सहभागी बिच प्रस्तुती र छलफल गराईएको कार्यक्रमकी संयोजक तथा शुभारम्भ नेपालकी सदस्य इन्जिनियर माधुरी देवले जानकारी दिईन । सचेतना कार्यक्रमका कारण ६ सय बढि बिद्यार्थी प्रत्यक्ष र २ हजार ४ सय बढि बिद्यार्थी अप्रत्यक्ष रुपमा सचेत हुने उनले प्रष्ट्याईन ।

शारिरीक मात्रै नभई मानसिक स्वास्थ्य सवल बन्नु पर्ने अहिलेको आवश्यकता भएको गाउँपालिकाका प्रमुख प्रशासकिय अधिृकृत धनेश्वर पौडेलले बताए । लागु औषधको दुव्र्यसनबाट बच्न युवा र समुदाय सचेत हुनु पर्नेमा उनले जोड दिए । समुदायलाई दिर्घकालिन रुपमा सकारात्मक प्रभाव पार्न सचेतना कार्यक्रमले सहयोग पुर्याएको शुद्धोधन गाउँपालिकाका अध्यक्ष कमलेशशरण चौधरीले बताए । बिद्यार्थी, शिक्षक र अभिभावक बिचको निरन्तर अन्तरक्रियाले समुदायका धेरै समस्या समाधान हुन सहयोग पुग्ने उनको भनाई थियो । कार्यक्रमकी प्रमुख प्रशिक्षक तथा शुभारम्भ नेपालकी अध्यक्ष शोभा भण्डारीले युवा र बिद्यार्थी मानसिक रुपमा बलियो भएर आत्महत्या रोकथाममा लाग्नु पर्ने बताईन ।

बालिका शिक्षा र समस्या बारे बोल्न सके किशोरावस्थाका धेरै समस्या समाधान हुने उनको भनाई थियो । युवाहरु लागु औषधको दलदलमा फस्दा परिवार र समाज नै प्रभावित हुने भएकाले सो बिषयमा सचेतना र परामर्शलाई प्राथमिकता दिनु पर्ने अध्यक्ष भण्डारीले बताईन ।