बुटवल,२२ माघ । विद्यार्थीको शारीरिक र मानसिक विकासका लागि खेलकुदको महत्वपूर्ण भूमिका हुने एक कार्यक्रमका वक्ताहरुले बताएका हुन् ।
तिलोत्तमा ६ स्थित डन मोडेल एकेडेमीमा सोमबारदेखि शुरु भएको स्पोर्टस् मिट कार्यक्रममा बोल्दै विद्यालय सञ्चालक समितिका अध्यक्ष शिव पाठकले विद्यार्थीको शैक्षिक गुणस्तरसंगै चौतर्फी विकासका लागि खेलकुद र अतिरिक्त क्रियाकलापलाई विद्यालयले महत्व दिएर हरेक वर्ष स्पोर्टस् मिटलाई निरन्तरता दिएको बताए ।
विद्यालयका प्राचार्य सिताराम भट्टराईले खेलकुदले विद्यार्थीलाई अनुशासित बनाउने बताए । विद्यालयकी अतिरिक्त क्रियाकलाप संयोजक ज्योति रेग्मीले खेलकुद सप्ताहमा सञ्चालन हुने खेलहरुको बारेमा प्रकाश पारिन् ।
उद्घाटनका अवसरमा नृत्य प्रशिक्षक तृष्णा घर्ती मगरको साथमा कक्षा ७ र कक्षा ९ मा पढ्ने छात्राहरुले नृत्य प्रस्तुत गरेका थिएभने कलात्मक शैलीमा मार्च पास समेत गरेका थिए ।
माघ २६ गते शुक्रबारसम्म सञ्चालन हुने खेलकुद सप्ताहको पहिलो दिन सिनियर लेवलका विद्यार्थीहरुको भलिबल प्रतियोगिता सम्पन्न भएको विद्यालयका सहप्राचार्य सन्तोष पौडेलले बताए । खेलकुद सप्ताहमा जुनियर र सिनियरतर्फ भलिबल, हाईजम्प, लङ्गजम्प, दौड, रिले दौड, क्रिकेट, स्याक रेस, प्लेट रेस, डोरी तान्ने खेल, सर्ट पुट, म्यूजिकल चेयर, फुटसल आदी खेल खेलाइने छ । त्यसै गरी कक्षा नर्सरी देखि कक्षा ३ सम्म स्पुन रेस, म्याथमेटिकल रेस, दौड प्रतियोगिता, ज्याकेट लगाउने प्रतियोगिता, म्यूजिकल चेयर, चकलेट दौड, मार्बल ग्यादरिङ, बलुन डान्स्, तातो आलु, सेप गेम आदी प्रतियोगिता गराइने छ । साथसाथै खेलकुद सप्ताहको अन्तिम दिन माघ २६ गते शुक्रबार अभिभावकहरुका लागि म्यूजिकल चेयर, डोरी तान्ने खेल जस्ता प्रतियोगिताहरु समेत आयोजना गरिने विद्यालयले जनाएको छ ।
४ आश्विन २०८१, शुक्रबार
