खोज

रोल्पा, १७ माघ ।

रोल्पामा दोश्रो जिल्लास्तरीय राष्ट्रपति रनिङशिल्ड प्रतियोगिता सम्पन्न भएको छ । प्रतियोगितामा ६६ मध्ये २८ स्वर्ण सहित २२ रजत र २० कास्य पदक प्राप्त गरी रोल्पा नगरपालिका प्रथम भएको छ ।

प्रतियोगितामा त्रिवेणी गाउँपालिका १७ स्वर्ण, १७ रजत र १६ कास्य पदक सहित द्वितीय भएको छ । प्रतियोगितामा माडी गाउँपालिकाले ६ स्वर्ण, ३ रजत र १२ कास्य पदक जितेर तृतीय भएको छ ।

प्रतियोगितामा परिवर्तन गाउँपालिकाले ४ स्वर्ण, ५ रजत र ११ कास्य पदक जितेको थियो । गंगादेव गाउँपालिकाले ४ स्वर्ण, ४ रजत र ३ कास्य, सुनिलस्मृती गाउँपालिकाले २ स्वर्ण, ५ रजत र १३ कास्य, थवाङ गाउँपालिकाले २ स्वर्ण, ४ रजत र १३ कास्य पदक जितेको थियो । यसैगरी प्रतियोगितामा सुनछहरी गाउँपालिका १ स्वर्ण, ३ रजत र २ कास्य, लुंग्री गाउँपालिका १ स्वर्ण, २ रजत र २ कास्य, रुन्टीगढी गाउँपालिका १ स्वर्ण, १ रजत र २ कास्य तथा पदक जितेका थिए ।

प्रतियोगितामा कराँतेतर्फ ९ स्वर्ण, उसुतर्फ ६ स्वर्ण र तेक्यान्दोतर्फ ५ स्वर्ण पदक जितेर रोल्पा नगरपालिका टिम च्याम्पियन भएको थियो । यसैगरी एथलेटिक्सतर्फ ८ स्वर्ण पदक जितेर त्रिवेणी गाउँपालिका टिम च्याम्पिएन भएको थियो ।

प्रतियोगितमा महिला भलिवल तर्फ लुंग्री गाउँपालिकाकी सिम्रन पुन, पुरुष भलिवल तर्फ सुनिल स्मृती गाउँपालिकाका दिनेश भण्डारी, महिला कवड्डी तर्फ रोल्पा नगरपालिकाकी सञ्जिवनी विक उत्कृष्ट खेलाडी घोषित भएका थिए । यसैगरी पुरुष कपर्दी तर्फ रोल्पा नगरपालिकाका निशान्त थापा, एथलेटिक्स पुरुष तर्फ रोल्पा नगरपालिकाका मिलन विक र एथलेटिक्स महिलातर्फ त्रिवेणी गाउँपालिकाका देवा खत्री उत्कृष्ट खेलाडी घोषित भएका थिए ।

प्रतियोगिता गत शनिवार पूर्व अर्थमन्त्री वर्षमान पुनले उद्घाटन गरेका थिए । माघ १६ गते सकिने भनिएको प्रतियोगिता एक दिन लम्विएको थियो । अधिकांश खेल जिल्ला सदरमुकाम लिवाङको टुडिखेलमा खेलाइएको भए पनि दौड भने माडीचौर खेलमैदानमा खेलाइएको थियो ।

जिल्लाका दशवटै स्थानीय तहका खेलाडीहरुको सहभागिता रहेको उक्त प्रतियोगिता ६६ पदकका लागि प्रतिष्पर्धा भएको थियो । यसअघि जिल्लाका दशवटै स्थानीय तहले राष्ट्रपति रनिङशिल्ड प्रतियोगिता सम्पन्न गरिसकेका छन् । जिल्लास्तरीय रनिङशिल्ड जित्ने खेलाडीहरु प्रदेशस्तरीय रनिङ शिल्ड प्रतियोगितामा सहभागिता जनाउने छन् ।

तेश्रो राष्ट्रपति रनिङशिल्ड प्रतियोगिता रोल्पाको थवाङमा सम्पन्न गर्ने गरी ओलम्पिक झण्डा हस्तान्तरण गरिएको छ ।