खोज

बर्दघाट, १५ माघ । सिर्जना कुमारी थारु चीनमा भएको एशियन खेलकुदमा नेपालको लागि पदक दिलाएको खेल कबड्डीको खेलाडी हुन् । पश्चिम नवलपरासी प्रतापपुरकी सिर्जनाको कक्षा ५ पढ्दा देखि नै कबड्डी खेलप्रति लगाव थियो । अन्ततः देशको लागि पदक दिलाउने खेलाडीको रूपमा इतिहास लेखाइन ।

विपन्न परिवारकी सिर्जनाले खेलप्रति निकै लगाव रहेपनि औपचारिक प्रशिक्षण गर्न भने आर्थिक अभावकै कारणले सकिनन् । विद्यालयस्तरमा आयोजना हुने प्रतियोगिताले कबड्डी खेलले आफुलाई तानेको उनी बताउँछिन् । विद्यालयमा कबड्डी खेलको आयोजना हुने गर्दथ्यो, ठूलो कक्षाको दाइ दिदीहरू खेलेको देख्दा म पनि यो खेल खेल्छु भन्ने मनमा आयो र खेल्न थाले उनले भनिन् । २०६७ सालमा राष्ट्रपति रनिड शिल्डमा पहिलो पटक आदर्श माध्यमिक विद्यालय सेमरीको तर्फबाट उनले सहभागिता जनाएकी थिइन । प्रतियोगितामा दोश्रो स्थान हासिल गरेपछि हौसला बढेको र खेलप्रति अझै समर्पित हुँदै गएको अतित उनले स्मरण गरिन ।

कबड्डीमा लेफ्ट कभरमा आफ्नो खेल्ने मुख्य पोजिसन रहेको र आवश्यकता अनुसार मिड र सेकेण्डमेनको भूमिका समेत धेरै प्रतियोगितामा आफूले निभाएको उनी बताउँछिन । विद्यालयस्तरमा गोविन चौधरीले प्रशिक्षण पाएकी उनी उच्च शिक्षा हासिल गर्न नपाएकोमा अहिले पछुताउँछिन । सुरुवाती दिनमा घरमा आमाले खेल छोडेर पढाइमा ध्यान दिन भनेपनि आफूले पढाइलाई भन्दा खेललाई प्राथमिकतामा राखेको उनले बताइन । राम्रोसँग नेपाली बोल्न समेत गाह्रो मान्ने सिर्जनाकी आमा देवी महतोले सिर्जनाले पाएको सफलताले सबैमा खुसी छाएपनि खेलेर जीवनयापन गर्न समस्या हुने तनाव सधै हुने बताइन ।

सिर्जनालाई कबड्डी खेल्न प्रेरित गर्ने राजु क्षेत्री हाल नवलपरासी कबड्डी संघका जिल्ला अध्यक्ष छन र राजुलाई नै सिर्जनाले गुरु मान्ने गर्छिन । राजु गुरुले हौसला र खेल कौशलता नसिकाएको भए म आज देशको लागि पद दिलाउने खेलाडीको रूपमा हुने थिइन सिर्जनाले भनिन् ।
झिँगटीले बारेको घर, फुसको छानो र दलिनमा लहरै झुण्डिएका पदक र प्रमाणपत्र हेदै बाबु बेनीराम थारु भावुक हुँदै भन्छन, छोरीले देशको नाम उँचो बनाएकी छन तर घरको आर्थिक अवस्थामा सुधार हुन सकेको छैन । खेती किसानी गरेर परिवार चलाउँदै आएका उनी राज्यले केहि आर्थिक सहयोग गरिदिए हुन्थ्यो भन्नेमा आशावादी देखिन्छन । विद्यालयस्तरबाटै निरन्तर कबड्डी खेल खेल्दै आएकी सिर्जनाले रा.खे.प. कपमा तेश्रोस्थान, आठौ राष्ट्रपति रनिड शिल्ड नेपालगँजमा तेश्रो, राष्ट्रिय महिला कबड्डी प्रतियोगिता २०७८ मा दोश्रो, नवौँ राष्ट्रपति रनिड शिल्डमा दोश्रो स्थान हासिल गर्न उनको टोली सफल भएको थियो ।

गत साफ खेलकुदको लागि छनौट प्रतियोगितामा अन्तिम क्षणमा छनौट नहुँदा सबैभन्दा दुखित बन्न पुगेको उनले बताइन । फिजिकल्ली पनि फिट थिए, आफ्नो स्थानबाट उत्कृष्ट खेल पनि प्रदर्शन गरेकै थिएँ तर पनि अन्तिममा छनौटमा पर्न सकिन्, मेरो लागि खेल जिवनकै सम्भवतः त्यो दुखत क्षण हो, उनले भनिन । छनौट हुन नसक्दा खेल जिवन नै छाडने अवस्थामा पुगेको समेत उनले बताइन ।

नेपाल कबड्डी संघका केन्द्रिय उपाध्यक्ष कुमार आले सिर्जनामा भएको लगनशिलताका कारण उनी यो स्थानसम्म पुगेको बताउँछन । जिल्लामा हुने प्रतियोगिताहरूमा उनी धेरै पटक सर्वोत्कृष्ट खेलाडी बन्न सफल रहिन, मेहनत र लगावका कारण उनले सफलता पाउन सकिन् र नेपालको प्रतिनिधित्व गर्दै एशियाली खेलकुदमा समेत नेपाललाई पदक दिलाउन सफल रहिन, आलेले भने ।

अहिलेसम्म नवलपरासीका लक्ष्मण पासवानले सन १९९६ को एशियाली खेलकुद र सिर्जनाले २०२३ मा सम्पन्न एशियाली खेलकुदमा अन्तर्राष्ट्रिय पदक जितेका छन । सिर्जना नवलपरासीकी पहिलो महिला खेलाडी हुन जसले अन्तर्राष्ट्रिय पदक दिलाएकी हुन । à