खोज

बुटवल, १२ माघ । विद्यालय तहको विज्ञान तथा प्रविधी विषयमा समाबेश गरिएको सुचना तथा संचार प्रविधि एकाई अन्तर्गतका विषयबस्तु शिक्षण सहज गराउने उद्येश्यका साथ रुपन्देहीमा विज्ञान कार्यशाला सम्पन्न भएको छ । जिल्लाका विज्ञान शिक्षकहरुको सहभागितामा विज्ञान शिक्षक समाज रुपन्देहीको आयोजनामा कालिका मानवज्ञान माविमा एक दिने कार्यशाला गरिएको हो ।

कार्यक्रमको उदघाटन गर्दै कालिका मानवज्ञान माविका विद्यालय व्यवस्थापन समितिका अध्यक्ष नित्यानद ज्ञवालीले शिक्षक सिकाईलाई निरन्तर अघि बढाउन विद्यालयबाट सहयोग गर्ने प्रतिवद्धता जनाए । विज्ञान विषयमा समावेश गरिएको सुचना तथा संचार प्रविधि सम्बन्धि विषयवस्तु सबै विषय शिक्षणका लागि उत्तिकै महत्वपूर्ण हुने भन्दै शिक्षकहरुबाट नै गरिएको महत्वपूर्ण कार्यलाई प्रशंसा गरे ।

कार्यक्रममा विद्यालयका प्रधानाध्यापक दिनेश थापाले यो विषयवस्तुलाई सरल, सहज र व्यवहारिक बनाउने जिम्मेवारी विज्ञान शिक्षकको काँधमा रहेको बताए । सुचना तथा संचार प्रविधि सम्बन्धि विषयवस्तु शिक्षणलाई सहज बनाउने गरि अन्तरक्रिया गर्दै निचोड निकाल्न उनले सुझाव दिए ।

विद्यालय तहको विज्ञान तथा प्रविधी विषयमा समाबेश गरिएको सुचना तथा संचार प्रविधि एकाई अन्तर्गतका विषयबस्तुहरुमा विज्ञान शिक्षकहरुमा देखा परेका अन्यौलता र आगामी एसईई परीक्षालाई लक्षित गरेर विभिन्न बिषयबस्तुमा छलफल भएको समाजका रुपन्देही जिल्ला अध्यक्ष दिपक बन्जाडेले बताए । विकास शिक्षकहरुको साझा संगठन विज्ञान शिक्षक समाजले विज्ञान शिक्षकको क्षमता अभिवृद्धि र शिक्षण अनुभव आदानप्रदानको लागि कार्यशाला आयोजना गरिएको र भविष्यमा सरोकारवाला अन्य सबै निकायहरुसँग सहकारी गरि यस्ता कार्यक्रम निरन्तर दिने उनले बताए ।

कार्यशालाको सहजीकरण कम्प्युटर शिक्षक शेखर पौडेल र विज्ञान तथा प्रविधि पाठ्यपुस्तकका लेखक चिन्तामणि पन्थीले गरेका थिए । कार्यशालामा सुचना तथा संचार प्रविधि शिक्षणका समसामयिक मुद्धा, चुनौती, शिक्षण विधि र मुल्यांकनका विभिन्न पक्षहरुमा छलफल गरिएको थियो । कार्यशालामा रुपन्देहीका १६ पालिकाका ७० जना विज्ञान शिक्षकहरुको सहभागिता रहेको थियो ।