खोज

देवदह, १२ माघ ।

रुपन्देहीको देवदहमा अन्तर विद्यालय स्तरीय प्रथम राष्ट्रपति कप रनिङ्ग शिल्ड छनोट प्रतियोगिता–२०८० शुरु भएको छ । ३ दिन सम्म चल्ने प्रतियोगिताको एक कार्यक्रमका बिच प्रतिनिधि सभा सदस्य छविलाल विश्वकर्माले उद्घाटन गरे ।

देवदह नगरपालिकाको आयोजना र देवदह माध्यमिक विद्यालयको व्यवस्थापनमा अन्तर विद्यालय स्तरीय प्रथम राष्ट्रपति कप रनिङ्ग शिल्ड छनोट प्रतियोगिता–२०८० शुरु भएको हो । प्रतियोगितामा देवदह क्षेत्रमा रहेका सामुदायिक तथा संस्थागत गरी २५ विद्यालयहरुको सहभागिता रहेको छ ।

प्रतियोगितामा छात्र÷छात्रा भलिवल, छात्र÷छात्रा कवड्डी, रिले दौड, कराँते लगायतका विधामा प्रतिस्पर्धा हुनेछ । प्रतियोगिताको उद्घाटन गर्दै प्रतिनिधि सभा सदस्य विश्वकर्माले प्रतियोगिताले राष्ट्रिय तथा अन्तर्राष्ट्रिय खेलाडी उत्पादन गर्न टेवा पुग्ने बताए । उनले खेलाडीहरु राष्ट्रिय गहना भएकोले खेलाडीको संरक्षण संगै प्रोत्साहन गर्न स्थानीय तहले भूमिका खेल्नु पर्नेमा जोड दिए ।

उनले विद्यार्थीहरुमा रहेको प्रतिभा पहिचान गरेर उनीहरुलाई अगाडि बढउनको लागि स्थानीय तहले खेलकुद पूर्वाधार निर्माण गर्नुपर्नेमा जोड दिए । पुर्वमन्त्री समेत रहेका नेता विश्वकर्माले बौद्ध विश्वविद्यालय संचालन संगै देवदह क्षेत्र शैक्षिक हवको रुपमा अगाडि बढिरहेको बताए ।

उनले शिक्षा संगै विद्यार्थीहरुलाई अतिरिक्त क्रियाकलाप संग पनि जोडेर लैजान आवश्यक रहेको औल्याए । देवदह नगरपालिकाका प्रमुख धु्रवप्रसाद खरेलले खेलकूदकोृ विकासमा नगरपालिका अगाडि बढिरहेको बताए ।

कार्यक्रममा नगरपालिकाका प्रमुख प्रशासकीय अधिकृत कृष्णप्रसाद सापकोटा, सशस्त्र प्रहरी वलका बाहिनीपति दिपककुमार थापा लगायतले आ–आफना भनाई राखेका थिए । प्रतियोगिता शुरुहुनु भन्दा अगाडि प्रतियोगितामा सहभागिता जनाएका विद्यालयले मार्चपास प्रस्तुत गरेका थिए । नगर उपप्रमुख विद्यालक्ष्मी गुरुङ्ग र इन्दिरा अर्यालले पनि आ–आफ्नो धारणा राखेका थिए ।

उद्घाटन खेलमा विभिन्न प्रतियोगिता सम्पन्न भएको छ । जस अन्तर्गत १५ सय मिटर छात्रा तर्फ भएको दौडमा जनप्रिय माविका उषा दर्लामी प्रथम, देवदह बुद्ध पव्लिकका अमृता हमाल द्वितिय, प्रगति माविका सपना नेपाली तृतीय र ज्ञान ज्योति माविका मिना तामाङ्ग सान्त्वना भएका छन् । यसैगरी छात्र तर्फको सोही खेलमा नारायणी पव्लिक स्कुलका शान्तराम परवान प्रथम, देवदह माविका सुभाष बराल द्वितिय, केरवानी माविका सविन घर्ती तृतीय र जनप्रिय माविका अभिषेक फाल सान्त्वना भएका छन् ।

यसैगरी प्रतियोगिता अन्तर्गत छात्रा तर्फ भएको सटफुट खेलमा न्यू नमुना स्कुलका प्रिंशा सिंजाली प्रथम, सगरमाथा स्कुलका कृष्टि पौडेल द्वितीय, जनप्रिय माविका खिमा खत्री तृतीय र सेभेन स्टार स्कुलका मेनुका चौधरी सान्त्वना भएका छन् । छात्र तर्फ भएको सोही खेलमा देवदह बुद्ध पव्लिक स्कुलका रविस सुनार प्रथम, सेभेनस्टार स्कुलका सुमन गुरुङ्ग द्वितिय, केरवानी माविका सुजन पटेल तृतीय र सगरमाथा आवासी माविका दिव्सन ठकुरी सान्त्वना भएका छन् ।