खोज

बुटवल, ७ माघ । उच्च शिक्षालय तथा माध्यामिक विद्यालय संघ नेपाल (हिसान), रुपन्देहीको आयोजनामा रुपन्देहीमा जिल्लास्तरीय अन्तर विद्यालय भलिबल प्रतियोगिता आईतबारदेखी शुरु भएको छ । कार्यक्रमको तिलोत्तमा नगरपालिकाका नगरप्रमुख रामकृष्ण खाणले उद्घाटन गर्दै शिक्षा र खेलकुद एउटै सिक्काको दुई पाटा भएको बताए । नेपालमा शिक्षामा निजि क्षेत्रबाट धेरै महत्वपुर्ण योगदान दिएको भन्दै सरकारबाट आवश्यक सहयोग गर्न सधै तत्पर रहेको बताए ।

निजि क्षेत्रबाट भएको लगानीलाई माफियाका रुपमा हेर्ने गलत सोचलाई चिर्ने गरि अगाडी बढ्न जरुरी रहेको तर्क दिदै उनले शिक्षामा धेरै परिवर्तन आएको बताए । कुनै समय विद्यार्थीहरु केवल अध्ययन गर्नुपर्ने अभिभावकको सोच अहिले परिवर्तन आएको भन्दै उनले अहिले सबै पक्षबाट खेलाडीलाई सहयोग हुने गरेको बताए ।

कार्यक्रममा उच्च शिक्षालय तथा माध्यामिक विद्यालय संघ नेपाल (हिसान), रुपन्देहीका अध्यक्ष दिनेश भुषालले वर्षेनि संस्थागत हकहित, विकाससंगै बालबालिकाहरुको प्रतिभा प्रस्फुटनका विविध कार्यक्रमहरु गर्दै आएको बताए । हाजिरीजवाफ, बक्तृत्वकला, साहित्यिक साथै खेलकुद गतिविधिहरु गर्दै आएको उनले बताए ।

कार्यक्रममा हिसानका केन्द्रीय उपाध्यक्ष लोकनाथ उपाध्यायले खेलभावनाका साथ प्रतिभा प्रस्फुटन गर्ने उदेश्यका साथ स्वच्छ प्रतिस्पर्धा गराउन सुझाव दिए ।

कार्यक्रममा संस्थाका सल्लाहकार कृष्ण प्रसाद पौडेलले पछिल्लोसमय शैक्षिक पाठ्यक्रममा परिवर्तन गर्न जरुरी रहेको बताए । अन्तराष्ट्रिय आवश्यकता र माग अनुसारको ब्यवहारिक शिक्षालाई जोड दिन जरुरी रहेको उनले बताए ।

कार्यक्रममा अभिभावक संघ रुपन्देहीका अध्यक्ष लोकनाथ ज्ञवालीले खेलाडी उत्पादनको आधार मानिएको विद्यालय खेलकुदलाई महत्व दिनुपर्ने आग्रह गरे । संस्थाका पुर्वअध्यक्ष टुक बहादुर क्षेत्रीले विद्यार्थी र खेलकुदको सम्बन्धबारे प्रकाश पार्दै विद्यालयस्तरमा हुने प्रतियोगिता जरुरी रहने बताए ।

तिलोत्तमा नगरपालिका वडा नं ३ का वडाअध्यक्ष कल्याण पौडेल, संस्थाका सचिव बाबुराम बन्जाडेले शिक्षा र खेलको महत्वलाई प्रकाश पारेका थिए । संस्थामा रुपन्देहीमा ५४ विद्यालयहरु आवद्ध छन ।

एभरेष्ट, न्यु होराईजन, सगरमाथा, सेन्ट जोसेफ, बुद्ध पब्लिक र अक्सफोर्ड विजयी

तिलोत्तमास्थित सिद्धार्थ बोर्डिङ स्कुल खेलमैदानमा आईतबार भएको छात्रतर्फको उद्घाटन खेलमा एभरेष्ट बोर्डिङ स्कुल विजयी शुरुवात गरेको छ । एभरेष्टले स्कलर्स होम बोर्डिङ स्कुललाई २५–१७, २५–११ को सेटमा जित निकालेको हो ।

यसैगरि पहिलो दिन भएको खेलमा न्यु होराईजनले त्रिभुवनलाई २५–११, २५–९, सगरमाथाले काशी नोबेल एकेडेमीलाई २५–१६, २७–२५, सेन्ट जोसेफले न्यु ईन्भारोमेन्टलाई २५–१६, २५–१८, बुद्ध पब्लिकले दीप बोर्डिङलाई २६–२४, २५–२२ तथा अक्सफोर्डले प्यारामाउण्टलाई २५–७, २५–१७ को सोझो सेटमा पराजित गर्दै अर्को चरणमा प्रवेश गरेका छन ।

भलिबल प्रतियोगिताका संयोजक याम बहादुर रानाले छात्र र छात्रा प्रतियोगिता गरिने बताए । प्रतियोगितामा छात्र÷छात्रा दुबै टिमको प्रथम टिम नगद १५ हजार रुपैया, द्घितिय टिम १० हजार र तृतिय टिमले नगद ५ हजार रुपैया, कप, मेडल, प्रमाणपत्रबाट पुरस्कृत गरिने उनले बताए । छात्रको १४ र छात्राको ९ वटा टिमले भाग लिने बताए । प्रतियोगिता फाईनल खेल तथा समापन माघ ९ गते हुनेछ ।