खोज

गुल्मी, ५ माघ ।  स्थानीय कला संस्कृति र रैथाने परिकारको प्रवद्र्धन गर्ने उद्देश्यले गुल्मीको रेसुङ्गा नगरपालिकामा होम स्टे सञ्चालन गरिएको छ । जिल्लामा भित्रिने आन्तरिक एवं वाह्य पर्यटकहरूलाई लक्षित गरि रेसुङ्गा नगरपालिका १३ अन्तर्गत उपल्लो भँगारीमा ‘रेसुङ्गा होम स्टे’ सञ्चालनमा आएको हो ।

जनजाती समुदायको बाहुल्यता रहेको उक्त ठाउँमा स्थानीय समुदायको पहलमा रेसुङ्गा नगरपालिका, गुल्मी उद्योग बाणिज्य संघ लगायतका संस्थाको सहयोगमा ‘रेसुङ्गा होम स्टे’ सञ्चालन गरिएको हो । पछिल्लो समय गुल्मीमा पर्यटकीय क्षेत्रमा घुम्न आउने मानिसहरू होम स्टेमा पुग्ने र त्यहाँको उत्पादित रैथाने खानाका विभिन्न परिकारहरूमा रमाउन थालेका छन् ।

पुरानो संस्कृतिलाई जोगाई राख्न त्यहाँ उत्पादित रैथाने खानाको संरक्षण गर्नुका अतिरिक्त स्थानीयहरूको जीविकोपार्जनमा सहयोग पुराउन आन्तरिक तथा बाह्य पर्यटकहरू भित्राउने उद्देश्यले होम स्टे सञ्चालन गरिएको वडाध्यक्ष हुमबहादुर बस्नेतले बताए । होम स्टेबाट देखिने उत्तर तर्फका सुन्दर एवं मनोरम हिमाल र हिम श्रृङ्खलाहरूको दृश्यावलोकनले त्यहाँ पुग्ने जोकसैको मन लोभ्याई दिन्छ ।

होम स्टेमा पुग्नका लागि स्थानीय नगरपालिकाले भवन निर्माणका साथै मोटरबाटो लगायत अन्य संरचना निर्माणमा सहयोग गर्दै आएको छ । होम स्टेमा स्थानीय कला सँस्कृति र झाँकिहरूको प्रस्तुतीसँगै त्यहाँ उत्पादित कोदाको ढिडो, कोदाको सेलरोटी, मकै र फापरको आटो÷रोटी, सिस्नोको तरकारी, स्थानीय जातका लोकल कुखुरा पाहुनाको मुख्य रोजाईमा पर्ने गर्दछन ।

होम स्टेमा बस्न जाने जोकोहीले पनि एक दिन अगाडि नै खबर गर्नुपर्ने हुन्छ । हाल पन्ध्र जनासम्मलाई बास बस्ने व्यबस्था रहेको उक्त ठाउँमा पाहुनाहरूले आफ्नो रोजाईमा विभिन्न परिकारहरूको स्वाद चाख्न पाउने होम स्टे सञ्चालन समितिका संयोजक यज्ञमूर्ति श्रीसले जानकारी दिए । होम स्टेमा आएका पाहुनाहरूलाई कला र सँस्कृतिको माध्यमबाट मौलिक नृत्य प्रस्तुत गरि मनोरञ्जन प्रदान गरिन्छ ।

जनजाती समुदायको बाक्लो बस्ती समेत रहेको भँगारीमा स्थानीयहरूले सोरठी, घाटु, सालैजो जस्ता संस्कृतिको संरक्षण गर्दै आएका छन् । पछिल्लो समय रेसुङ्गा विमानस्थलको निर्माणसँगै होम स्टेमा आउने पर्यटकहरूको संख्यामा पनि बृद्धिहुने स्थानीयहरूको अपेक्षा छ ।
गत वर्षदेखि सञ्चालन आएको उक्त होम स्टे सदरमुकाम तम्घास नजिकै भएर पनि यसको बारेमा खासै प्रचार प्रसार हुन नसक्दा यतिबेला ओझेलमा परेको छ ।