खोज

बुटवल, २९ पुस ।

लुम्बिनी साना तथा मझौला ढुवानी ब्यबसायी संघको १० औं साधारण सभा तथा चौथो अधिवेशनले सुमन सापकोटाको नेतृत्वमा१३ सदस्यीय नयाँ कार्यसमिति चयन गरेको छ । जसको उपाध्यक्षमा सोमन तिमिल्सिना, महासचिवमा रमेशराज बज्राचार्य, सचिवमा नविन पोखरेल, सह–सचिवमा धर्मराज जैसी, कोषध्यक्षमा रविन्द्रकुमार श्रेष्ठ र सदस्यहरुमा पारसनाथ केसरी, रामप्रसाद शर्मा, आकाश जैसवाल, मथुरा कुहार, इन्द्रबहादुर क्षेत्री, विशाल अधिकारी, ऋतु घर्तीमगर रहेका छन् । त्यस्तै लेखा समितिमा गोपाल पाण्डेको संयोजकत्वमा दिनेश गौतम र गणेश जिशी सदस्य रहेको कार्यसमिति गठन भएको छ ।

साधारण सभा तथा चौथो अधिवेशनमा बोल्दै नेपाल ट्रक यातयात महासंघका वरिष्ठ उपाध्यक्ष लोकराज पोख्रेलले स्वरोजगार मजदुरहरुको हकहित संरक्षण र बिकासका लागि संस्था सधै प्रतिबद्ध रहेको बताए । बजारमा आएको आर्थिक मन्दीका कारण यातयात क्षेत्र पछिल्लो समय धरासायी बनेको बताउदै वरिष्ठ उपाध्यक्ष पोख्रेलले यातयातको क्षेत्रलाई सरकारले गम्धिर रुपमा लिनु पर्ने बताए ।

सवारी दर्ता, नविकरण र संचालन गर्दा आईपर्ने बिभिन्न समस्याहरुका बारेमा पटक पटक सरकारी पक्षको ध्यानाकर्षण गराउँदै आएको भएपनि सुनुवाई नभएको गुनासो गर्दै साना तथा मझौला ढुवानी ब्यबसायीहरुलाई सरकारले उपेक्षा गरेको संघका अध्यक्ष दिनेश थापाको भनाई छ । बुटवलमा प्रधान कार्यालय रहेको लुम्बिनी साना तथा मझौला ढुवानी ब्यवसायी संघको स्थापना लक्ष्मण क्षेत्रीको संयोजनमा २०७० सालमा साना तथा मझौला सवारीहरुको छाता संगठनका रुपमा स्थापना भएको थियो । छरिएर रहेका साना तथा मझौला ढुवानी ब्यबसायीहरु संगठित गरि सस्थाको स्थापना गरिएको एक दशक पुरा गर्न सफल भएको छ । यो संस्थामा हाल १ सय ५२ जना व्यवसायीहरुको आवद्धता रहेको छ । धेरैजसो स्वरोजगार मजदुर रहेको यो संस्था नेपाल ट्रक यातायात व्यवसायी महासंघसँग आवद्ध भएको केही वर्ष मात्रै भएको छ । संस्थाले स्वरोजगार मजदुरहरुलाई प्रोत्साहन गर्न आफुहरु हरपल तयार रहेको नेपाल ट्रक तथा यातयात महासंघका प्रदेश अध्यक्ष यमप्रसाद पाण्डेको भनाई छ ।

साना स्वरोजगार ब्यबसायीहरु रोजगारीको अवसर प्रदान गर्नु मुख्य लक्ष्य रहेको यो संस्थालाई ब्यवस्थित पार्किङ्गस्थल, रुट परमिट लगायत भारतीय सवारीले गर्दा ठूलो समस्या परेको उल्लेख गर्दै समस्या समाधानका लागि निरन्तर आवश्यक पहल गर्नुपर्ने सल्लाहकार मोहन पिएसको भनाई छ । साधारण सभामा महासचिवको प्रतिवेदन रविन्द्रकुमार श्रेष्ठले र कोषाध्यक्षको प्रतिवेदन नविन पोखरेलले प्रस्तुत गरेका थिए । कार्यक्रममा निवर्तमान अध्यक्ष लक्ष्मण क्षेत्री, कानुनी सल्लाहकार महेन्द्र पाण्डे,सदस्य रमेशराज बज्राचार्य लगायतले बोल्दै यातायात क्षेत्रको विकास र व्यवसायीलाई टिकाई राख्न संस्थाले पहल गर्नु पर्ने बताएका थिए । राष्ट्र निर्माणको मेरुदण्डको रुपमा रहेको यातायात क्षेत्र त्यसमा पनि साना र मझौला ढुवानीले बजारको कुना काप्चामा पुग्ने र साना तथा घरनिर्माणका सामग्री, दोकानका सामान तथा अन्य सामग्रीहरु ओसारपसार गर्न सहज भएको छ । प्रदेश भरको प्रमिट पाएको भएपनि हाल २ जिल्लामा मात्रै यस्ले सेवा दिइ रहेको छ ।