खोज

बुटवल, २९ पुस ।  पुस महिनाको चिसो, हुस्सुले ढाकिएको बुटवल । केवलकारको सुबिधा छोडेर युवाहरू हाईकिङ हँुदै कामाख्या दर्शनमा निस्किए । बुटवलको बमघाटदेखि बसन्तपुरसम्म पुग्ने पुरानो गोरेटो बाटो खोजी गर्दै युवाहरू हाईकिङ प्रवद्र्धन गर्ने लक्ष्यसहित जम्मा भएका थिए । पुरानो बाटो पहिल्याउनु भने सहज थिएन । राष्ट्रिय युवा संघ नेपाल रूपन्देही जिल्ला कमिटीको आयोजनामा समृद्धिको लागि पर्यटन प्रवर्द्धन भन्ने मुल नारासाथ बुटवल (गोलपार्क) देखि बसन्तपुरसम्मको बृहत ह्याईकिङ्ग कार्यक्रम गरेको हो ।

कार्यक्रममा सहभागी थिए पूर्वअर्थमन्त्री तथा नेकपा एमालेका केन्द्रीय उपाध्यक्ष बिष्णु पौडेल । बिहान ७ बजे हिँड्ने भनिएपनि जुट्दा ८ बज्यो । युवासंगै कार्यक्रममा रूपन्देहीका शिक्षण, पत्रकार, ब्यवसाय पेशाका साथै राजनीतिक नेताहरू गरि गर्ने करीब २ सय सहभागी थिए ।
हौसिएर शुरुवात भएको यात्रा चौपारीसम्म पुगेपछि गति कम भयो । पूर्वअर्थमन्त्री पौडेल आफै सहभागी भएको हुँदा पनि कार्यक्रममा आकर्षण थियो । सबै खाले उमेरका सहभागी रहेको यात्रामा गोरेटो बाटो पहिल्याउनु चुनौती बन्यो ।

पर्यटन ब्यवसायी तथा होटल एशोसियसनका केन्द्रिय सदस्य गोपाल राना लुम्बिनीको पर्यटनमा हाईकिङलाई जोड्नुपर्ने बताउँछन । घुम्न मन पराउने उनी देशको आर्थिक विकासको आधार पर्यटन भएको बताउँछन । ‘हामीले लोकललाई नै प्राथमिकता दिनुपर्छ ।’—उनले भने । प्राकृतिक गोरेटो बाटोमा मानिसहरू कम हिँड्ने र वर्षेनि पहिरोले गर्दा धेरै ठाउँमा गोरेटो बाटो खोज्न कठिन भएको उनले बताए । अब बाटो पहिचानको कामलाई जोड दिनुपर्ने उनले सुझाव दिए ।

सैनामैना नगरपालिकाका पूर्व नगरप्रमुख चित्र बहादुर केसीले बुद्धजन्मस्थल लुम्बिनीमा वार्षिक भित्रने पर्यटकको बसाइँ लम्ब्याउने गरि योजनाहरू बनाउन जरुरी रहेको बताए । बुद्धजन्मस्थलसँगै अन्य धेरै पर्यटकिय सम्भावना बोकेको क्षेत्रहरूमा साहसिक खेलहरूलाई जोडेर लैजानुपर्ने सुझाव दिए ।

हाईकिङ रमाईलो लिएका प्राध्यापक बाबुराम बन्जाडेले यस क्षेत्रको अर्गानिक विषयलाई जोडेर पर्यटनलाई प्रवद्र्धन गर्नुपर्ने बताउँछन । ‘हामीसँगै धेरै कला, संस्कृतिहरू छन ।’—उनले भने । यसैलाई नै पर्यटकमाझ पस्कन सके आर्थिक रूपमा आयआर्जन हुने उनले बताए ।
राष्ट्रिय युवा संघ रूपन्देहीका अध्यक्ष विकासजंग बस्नेतले युवाहरूमार्फत नै देशमा धेरै परिवर्तन आएको भन्दै अब आर्थिक विकासमा युवाहरूको अग्रसरता जरुरी रहने बताए । प्रचारका रूपमा गरिएको कार्यक्रमले अब भने यस क्षेत्रका पर्यटन ब्यवसायीहरूलाई बाटो खोल्न मद्दत मिल्ने उनको दाबी छ । देशको आर्थिक समृद्धिका लागि पर्यटनको बिकल्प नरहेको उनले बताए ।

समृद्धिको लागि पर्यटन प्रवर्द्धन भन्ने मुल नारासहित साथ बुटवल (गोलपार्क) देखि बसन्तपुरसम्मको बृहत ह्याईकिङ्ग कार्यक्रम भब्य रूपमा सफल भएको उनले बताए । पदयात्रामा नेकपा एमाले पोलिटब्युरो सदस्य लिला गिरी, माधव शर्मा, खिमलाल भट्टराई, केन्द्रीय सदस्य सावित्रा अर्याल, गोमा देवी आचार्य, प्रतिनिधि सभा सदस्य बासुदेव घिमिरे, जिल्ला अध्यक्ष तेजेन्द्र केसी, युवा संघका नेता तथा कार्यकर्ताहरूको सहभागीता रहेको थियो ।