खोज

दाङ, २४ पुस ।

दाङको तुलसीपुर उपमहानगरपालिका वडा नम्बर–१९ मा रहेको धार्मिक एवं पर्यटकीय ऐतिहासिक स्थल छिल्लिकोटको संरक्षण तथा प्रवद्र्धन गर्न नेपाल पर्यटन बोर्डले चासो देखाएको छ । पर्यटकीय गतिविधिका लागि न्यूनतम भौतिक पूर्वाधारको विकास गर्न स्थानीय सरोकारवालाको समेत सहभागितामा छिल्लिकोटको विकास गरिने भएको छ ।

छिल्लिकोट तुलसीपुरबाट करिब १८ किमि पूर्व उत्तरमा रहेको छ । छिल्लिकोट पुग्न चोरकोटदेखि मालिका मन्दिरसम्म सिंढी निर्माण गरिने भएको छ । यस्तै सिंढी निर्माणका लागि पाँच लाख रूपियाँ विनियोजन भएको अध्यक्ष प्रेमनाथ योगीले बताए । छिल्लिकोटको कालिका मालिका क्षेत्रको संरक्षण तथा प्रवद्र्धन गर्न चालु वर्षमा नेपाल पर्यटन बोर्डबाट ३० लाख रूपियाँ विनियोजन भएको तुलसीपुर उपमहानगरपालिका वडा नंं. १९ का अध्यक्ष योगीले बताए ।

तुलसीपुर उपमहानगरपालिका भित्र रहेका अन्य वडाहरूको तुलनामा १९ नं. वडाको विकट क्षेत्र रहेपनि सबै क्षेत्रको सहयोगले दाङकै पर्यटकीय क्षेत्रको चिनारी बनाउने गरी काम भैरहेको अध्यक्ष योगीले बताए ।

पछिल्लो समय तुलसीपुर उपमहानगरपालिकाको सहयोगमा छिल्लिकोटमा बास बस्नको लागि होमस्टेको व्यवस्था पनि रहेको छ । ऐतिहासिक एवं धार्मिकस्थल मालिका कालिकाको मन्दिर तथा विश्वकै दुर्लभ वनस्पति सुगन्ध कोकिला बिक्री गरेर आम्दानी गर्ने गरेका छन् । सुगन्ध कोकिलाको वनले छिल्लिकोट प्रख्यात पनि छ ।

पर्यटकहरुले मालिका कालिकाको मन्दिर दर्शन, छिल्लिकोटे राजाको ऐतिहासिक दरबारको भग्नावशेष, भ्यूटावरबाट दृश्यावलोकन, उत्तरी हिमशृङ्खलाहरुको मनोरम परिदृश्य, मालागेडीको वन, चराचुरुङ्गीहरुको मधुर स्वरलगायत थुप्रै प्राकृतिक मनोरम दृश्यहरुको अवलोकन गर्न पाउने छन् ।