खोज

बुटवल, २१ पुस । बुटवलमा सम्पन्न प्रदेश स्तरिय प्रथम खुला मेयर कप ब्याडमिन्टन प्रतियोगिता २०८० को उपाधि लाफा समूहका विबेक न्यौपाने र मनोज फौदारको जोडी हात पारेका छन । न्यु लुम्बिनी ब्याडमिन्टन क्लबको आयोजनामा शनिबार भएको फाईनल खेलमा बुटवल ब्याडमिन्टन क्लबका गणेश रायमाझी र विश्वास नेपालको जोडीलाई २–० को सेटमा पराजित गर्दै उपाधि हात पारेका हुन । उपाधिसंगै न्यौपाने र फौदारको जोडीले नगद ५१ हजार १ सय ११ रुपैया, कप र मेडलबाट पुरस्कृत भएका छन । बुटवल ब्याडमिन्टन क्लबका रायमाझी र नेपालको जोडी भने उपविजेता बन्दै नगद ३५ हजार १ सय ११ रुपैया, कप, मेडल, प्रमाणपत्रमा चित्त बुझाए । निक्कै प्रतिस्पर्धात्मक खेलमा लाफा समूहका विबेक न्यौपाने र मनोज फौदारले लगातार २१–१५ र २१–१९ ले जित्दै उपाधि हात पारे ।

खेलमा फिट एण्ड फाईनका मिलन सुनार र अनिस थापाको जोडी तथा नेपालगंजका अनिल लाखे र दिनेश थापाको जोडी तेस्रो हुदै नगद २५ हजार १ सय ११ रुपैया, कप, मेडल प्रमाणपत्रबाट पुरस्कृत भए ।

भेट्रान्सतर्फ भने बुटवल ब्याटमिन्टनका पंकज ज्ञवाली र दीप आचार्यको जोडीले उपाधि जितेका छन । फाईनलमा नेपालगंजका अनिल लाखे र जयन्त श्रेष्ठको जोडीलाई ३–१ को सेटमा पराजित गर्दै उपाधि जितेका हुन । उपाधिसंगै ज्ञवाली र आचार्यको जोडीले नगद ३१ हजार १ सय ११ रुपैया, कप, मेडल, प्रमाणपत्रबाट पुरस्कृत भए । उपविजेता लाखे र श्रेष्ठको जोडी नगद २१ हजार १ सय ११ रुपैया, कप, मेडल, प्रमाणपत्रमा चित्त बुझाए ।

निक्कै प्रतिस्पर्धात्मक खेलमा नेपालगंजका अनिल लाखे र जयन्त श्रेष्ठको जोडीले पहिलो सेट २१–१९ ले जित्दै अग्रता लिएको थियो । तर बुटवल ब्याटमिन्टन क्लबका पंकज ज्ञवाली र दीप आचार्यको जोडीले दोस्रो सेट र तेस्रो सेट भने २१–१६, २१–१२ ले जित निकाल्दै उपाधि आफ्नो नाम गरे ।

खेलमा तिलोत्तमा ब्याडमिन्टन क्लबका सुरज गुरुङ र वसन्त थापा चर्तिको जोडी तथा रोहित पुरी र प्रनेश ढकालको जोडी तेस्रो हुँदै नगद १५ हजार १ सय ११, कप, मेडल, प्रमाणपत्रबाट पुरस्कृत भए । प्रतियोगितामा उत्कृष्ट खेलाडी मनोज फौदार, उदयमान खेलाडी नवलपरासी ब्याडमिन्टन क्लबका जयश कश्यप, अनुसासित खेलाडी हिमान्सु कुवर घोषित भए ।

एक समारोहका बिच बुटवल उपमहानगरपालिकाका नगरप्रमुख खेलराज पाण्डेय, प्रदेश खेलकुद परिषद लुम्बिनीका सदस्य सचिव जयप्रकाश भट्टराई, क्लबका अध्यक्ष बोनिन पिया, खेल संयोजक रोहित पुरीले खेलाडीहरुलाई पुरस्कार बितरण गरेका थिए । पुस २०–२१ गते ( दुई दिने) सम्म चलेको प्रतियोगितामा १० जिल्लाका खेलाडीहरुले भाग लिएका थिए ।