खोज

बुटवल, १२ पुस । रुपन्देही जिल्ला टेबल टेनिस संघको १८ औ साधारण सभा तथा छैटौ अधिवेशनबाट नवनिर्वाचित पदाधिकारी तथा सदस्यहरुको पदस्थापना कार्यक्रम सम्पन्न भएको छ । प्रदेश खेलकुद परिषद लुम्बिनीका सदस्य सचिव जयप्रकाश भट्टराईले कार्यक्रमको समुद्घाटन गर्दै संस्थागत सुदृढीकरणको अभियानलाई जोड दिन सुझाव दिए ।

जिल्लास्तरको खेलसंस्था संघमा नभए प्रदेश अन्तरगत भएको उनले बताए । लुम्बिनी प्रदेश समन्वय गरि अघि बढ्न तयार रहेको उनले बताए । खेलकुद नेता खेलकुदको विकासको लागि जन्माउन जरुरी रहेको उनले बताए । विद्यालयस्तरबाट खेलकुद विकासमा महत्वपूर्ण योगदान दिएको उनले दाबी गरे । लगानीका हिसाबबाट खेलकुदमा नीजि क्षेत्रबाट सबैभन्दै धेरै लगानी देखिने भन्दै सरोकारवाला संघसंस्थाहरुलाई जोडेर अघि बढ्नुपर्ने बताए । टेबलटेनिस खेलको जनशक्ति विकासमा रुपन्देहीको महत्वपूर्ण योगदान भएको भन्दै आगामी दिनहरुमा सहि ढंगबाट लैजान सके खेल विकास हुने बताए ।

कार्यक्रममा नवनिर्वाचित अध्यक्ष नर बहादुर क्षेत्रीले टेबलटेनिस खेलाडी, खेलप्रेमीहरुलाई जोड्दै खेल विकासलाई जोड दिने प्रतिवद्घता जनाए । टेबलटेनिस संस्थागत रुपमा बलियो भएपनि अझै पनि पुर्वाधारको अभाव रहेको उनले बताए । आफ्नो कार्यक्रममा एउटा खेलकुद पुर्वाधार गर्ने उनले प्रतिवद्घता जनाए ।

कार्यक्रममा प्रमुख सल्लाहकार अर्जुनमान सैजुले संस्था रहेमात्र खेल र खेलाडीको गरिमा बढ्ने भन्दै संस्था विकासमा जोड दिन सुझाव दिए । संस्था आर्थिक रुपमा बलियो बनाउन अक्षयकोष वृद्धि गर्न आग्रह गर्दै गतिविधि पहलमा उनले जोड दिए ।
कार्यक्रममा संघका अध्यक्ष सुरेन्द्र कुमार शाक्यले आफनो कार्यकालमा मेयर कपसहित विविध प्रतियोगिता र आईटिटिएफ प्रशिक्षक लेभल २ पास गरेका दक्ष जनशक्ति तयार भएको बताए ।

रुपन्देही जिल्ला खेलकुद विकास समितिका सदस्य सचिव राजेन्द्र श्रेष्ठ, प्याब्सन बुटवलका अध्यक्ष मित्रहरि आचार्य, संस्थापक अध्यक्ष कृष्ण कुमार श्रेष्ठ, उपाध्यक्ष महेश खनाल, सचिव रमेश न्यौपानेले सहकार्य गर्दै खेल विकासमा लाग्नुपर्ने बताए ।