खोज

धनगढी, ११ पुष । कैलालीको धनगढीमा जारी छैटौ फारवेष्ट पशुपति कप फुटबल प्रतियोगिताको अन्तिम चारको टुगो लागेको छ । सुदूरपश्चिम प्रदेश खेलकुद परिषद मुख्य प्रबद्र्धक र एनआरएनए मुख्य प्रायोजकमा जारी प्रतियोगिता अन्तरगत बुधवार भएका क्वाटर फाइनल खेलहरुमा बीएस–१५ युवा क्लब र इलाइट युवा क्लब जित निकाल्दै अन्तिम चार स्थान पक्का गरेका छन । यसअघि स्टार सिटी र आयोजक फारवेष्ट पशुपति युवा क्लब सेमिफाइनल स्थान बनाएका थिए ।

पहिलो क्वाटरफाइनल खेलमा बीएस १५ युवा क्लबले सुदूरपश्चिम ११ स्पोर्ट्स क्लबलाई २–१ गोल अन्तरले पराजित गरेको हो । बीएसको जितमा हरिस कडायत र विदेशी खेलाडी ग्लोरीले १–१ गोल गरे । खेलको १३ औँ मिनेटमा हरिस कडायतको गोल मार्फत अग्रता लिएको बीएसका विरुद्ध सुदूरपश्चिमका फागुराम चौधरीले त्यसको चौथो मिनेटमा गोल फर्काएर खेल बराबरीमा ल्याए । पहिलो हाफ १–१ गोलको बराबरी भएको थियो । दोस्रो हाफको २० औ मिनेटमा इलाइटका विदेशी खेलाडी ग्लोरीले निर्णायक गोल गरे । खेलमा हरिस कडायत म्यान अफ दी म्याच हुदै नगद ५ हजार पुरस्कार र ट्र्रफी प्राप्त गरे ।

अन्तिम क्वाटर फाइनल खेलमा इलाइट युवा क्लबले नेपाल प्रहरी सुदूरपश्चिम प्रदेशमाथि ५–१ गोल अन्तरको फराकिलो जित दर्ता निकाल्यो । इलाइटलाई जिताउन हरिस भट्टले ह्याट्रिक गरे । उनले खेल सुरु भएको १० औ, ११ औ मिनेटमा गोल गरेका थिए । खेलको ३५ औ मिनेटमा टिमलाई विनोद केसीले तेस्रो गोल गरे । दोस्रो हाफको ९ औ मिनेटमा विनोदले आफ्नो ह्याट्रिक पुरा गरे । दोस्रो हाफको २० औँ मिनेटमा इलाइटका अनुज गैरेको गोल मार्फत फराकिलो अग्रता बनाएको टिम विरुद्ध नेपाल प्रहरीका सुरज महतोले दोस्रो हाफको २२ औ मिनेटमा सान्त्वना गोल गरे । खेलको ह्याट्रिक गर्ने विनोद म्यान अफ दी म्याच घोषित हुदै नगद ५ हजार पुरस्कार र ट्रफी प्राप्त गरे ।

बिहीबार सेमिफाइनलका खेल हुनेछन् । पहिलो सेमिफाइनलमा स्टार सिटी र बीएस १५ तथा दोस्रो सेमिफाइनल आयोजक फारवेष्ट पशुपति युवा क्लब र इलाइट युवा क्लब भिड्नेछन् । शनिवार फाइनल खेल हुने छ । प्रतियोगिताको विजेताले पाँच लाख र उपविजेताले २ लाख पुरस्कार पाउने छन् । प्रतियोगिताको उत्कृष्ट खेलाडीलाई २५ हजार तथा विभिन्न विधाका उत्कृष्टले १५–१५ हजार रुपैयाँ पुरस्कार पाउने आयोजक फारवेष्ट पशुपति युवा क्लबका अध्यक्ष खेम रावतले बताए ।