खोज

बुटवल ।

एमजी क्लव बुटवलको आयोजनामा यही पुस ९ गते सोमबार खुल्ला ब्याडमिन्टन प्रतियोगिता हुने भएको छ ।

राष्ट्रिय खुल्ला ब्याडमिन्टन प्रतियोगितामा दुईवटा विधामा ६४–६४ टिमले प्रतिष्पर्धा गर्नेछन् । प्रतियोगिताबारे जानकारी दिन सोमबार बुटवलमा आयोजित पत्रकार सम्मेलनमा ब्याडमिन्टन प्रतियोगिताको तयारी अन्तिम चरणमा पुगेको बताइएको छ ।

रुपन्देहीको तिलोत्तमा–६ स्थित तिलोत्तमा ब्याडमिन्टन क्लबको कभर्ड हलमा हुने प्रतियोगितामा खुल्ला मेन्स डबल र भेट्रान्स मेन्स डबल गरी दुई विधामा प्रतिस्पर्धा हुने खेल संयोजक वसन्त बहादुर थापा क्षेत्रीले जानकारी दिए । प्रतियोगितामा मेन्स डबलतर्फको विजेताले ४० हजार नगद राशीसहित कप मेडल र प्रमाणपत्र प्राप्त गर्ने छन् भने उपविजेताले २५ हजार तथा अन्तिम ४ मा पुग्ने २ समूहलाई १५ हजार नगद राशीले सम्मान गरिने संयोजक थापाले जानकारी दिए । यसैगरी भेट्रान्सतर्फ विजेताले नगद ३० हजार, कप, मेडल र प्रमाणपत्र पाप्त गर्ने छ । यसैगरी उपविजेताले २० हजार र अन्तिम ४ मा पुग्ने २ समुहले १० हजार नगद राशी प्राप्त गर्नेछन् ।

राष्ट्रिय टोलीमा सहभागी उत्कृष्ट २० सम्म रहेका खेलाडीले भने सहभागी हुन नपाउने क्लबका अध्यक्ष रामबहादुर सिंजालीले जानकारी दिए । यसैगरी भेट्रान्सतर्फको खेलमा प्रत्येक समुहमा एक जना अनिवार्य ४५ वर्ष उमेर पुगेको र एक जना ४० वर्षमाथिको भए पनि हुने उनले बताए । प्रतियोगितामा सहभागी हुन खुल्लातर्फ ३ हजार र भेट्रान्सतर्फ २५ सय प्रवेश शुल्क लिइने उनले बताए ।

प्रतियोगिता सम्पन्न गर्न ७ लाख खर्च अनुमान गरिएको बताउँदै क्लबका महासचिव निल बहादुर कुंवरले खेलाडीका लागि खाना तथा नास्ताको समेत व्यवस्था गरिएको जानकारी दिए । प्रतियोगितामा आयोजक क्लबका तर्फबाट ७ समुहले सहभागिता जनाउने भएका छन् । पाल्पाबाट बसाई सरी रुपन्देहीमा आएकाहरु मिलेर स्थापना गरिएको एमजी क्लबमा हाल ८० जना सदस्य रहेका छन् । ‘सम्पूर्ण युवा एक हौं, समृद्ध समाज बनाऔं’ भन्ने मूल नाराका साथ एमजी क्लव स्थापना गरिएको थियो ।