खोज

काठमाडौँ ।

पश्चिमी वायुको आंशिक प्रभावको कारण आज देशका पहाडी भू-भागमा आंशिक बदलीको अवस्था छ। तराईका केही स्थानमा  हुस्सु र कुहिरो लागेको छ।

मौसम पूर्वानुमान महाशाखाका अनुसार देशका पहाडी भू-भागका थोरै स्थानमा आज दिउँसो हल्का वर्षाको सम्भावना रहेको छ। देशका उच्च पहाडी तथा हिमाली भू-भागका थोरै स्थानमा हल्का देखि मध्यम खालको हिमपातकोसमेत सम्भावना रहेको महाशाखाले जनाएको छ।

आज राति पनि देशका पहाडी भू-भागमा आंशिक देखि सामान्य बदलीकै अवस्था रहने छ। बाँकी भू-भागमा भने मौसम सामान्यतया सफा रहनेछ।

पहाडी भू-भागका थोरै स्थानमा मंगलबार राति पनि हल्का वर्षाको सम्भावना रहेको विभागले जनाएको छ। त्यस्तै देशका उच्च पहाडी तथा हिमाली भू-भागका थोरै स्थानमा हल्का देखि मध्यम प्रकारको हिमपातकोसमेत सम्भावना छ।

भोलि (बुधबार) कोशी, बागमती र गण्डकी प्रदेशका पहाडी भू-भागका थोरै स्थानमा हल्का वर्षाको सम्भावना रहेको विभागले जनाएको छ। त्यसैगरी कोशी, बागमती, गण्डकी र कर्णाली प्रदेशका उच्च पहाडी तथा हिमाली भू-भागका एक-दुई स्थानमा हल्का हिमपातकोसमेत सम्भावना छ।

यतिबेला देशभरिको तापक्रम घट्ने क्रममा रहेको हुँदा त्यसबाट हुन सक्ने असरबाट बच्न आवश्यक सतर्कता अपनाउन पनि विभागले सबैलाई आग्रह गरेको छ।