खोज

तिलोत्तमा,२३ मंसिर । पांचौ तिलोत्तमा उपमेयर कप खुल्ला महिला भलिबल प्रतियोगिता तिलोत्तमाको कुंवरवर्ती बोर्डिङ हाइ स्कुलमा शनिबारदेखि शुरु भएको छ । प्रतियोगिताको तिलोत्तमा नगरपालिकाकी उपप्रमुख जगेश्वरदेवी चौधरीले शनिबार उद्घाटन गरिन् । सो अवसरमा बोल्दै उपप्रमुख चौधरीले महिलाहरुको मानसिक र शारीरिक स्वास्थ्यका लागि खेलकुदको महत्वपूर्ण भूमिका हुने बताइन् ।कुंवरवर्ती बोर्डिङले महिला भलिबल सहित अन्य खेलकुद प्रतियोगिताको राम्रो व्यवस्थापन गरेको र जिल्लामै उत्कृष्ट नतिजा हासिल गरेको भन्दै उनले प्रशंसा गरिन् ।

नगरका शिक्षा युवा तथा खेलकुद शाखा प्रमुख गंगाराम आचार्यले खेलकुदले हरेक नागरिकलाई अनुशासित र स्वस्थ बनाउने भएकाले खेलकुदमा सरकारले लगानी बढाउन आवश्यक रहेको बताए ।

कुंवरवर्ती बोर्डिङ हाइ स्कुलका प्राचार्य दीपक खनालले नेपालको राष्ट्रिय खेलको मान्यता पाएको भलिबल खेललाई स्थानीय सरकारले पनि प्राथमिकतामा राखेर वजेट दिनुपर्नेमा विगत भन्दा इभेन्टहरु र वजेट कटौती गरिनु दुखद भएको बताए । लिग कम र बेस्ट अफ फाइभका आधारमा खेलाइने प्रतियोगितामा रुपन्देही र कपिलवस्तुका ६ टिमले भाग लिएका छन् । जसमा रुपन्देहीका न्यू होराइजन,एभरेष्ट,कुंवरवर्ती,सेन्ट जोसेफ,शान्ति नमूना र कपिलवस्तुको हिलबर्ट बोर्डिङले प्रतिस्पर्धा गर्दैछन् ।

तीन दिनसम्म चल्ने प्रतियोगिताको विजेताले ६१ हजार,उपविजेताले ४१ हजार,तेस्रोले २१ हजार र सान्त्वना हुने टिमले ११ हजार नगद सहित ट्रफी र प्रमाणपत्र पाउने विद्यालयका अतिरिक्त क्रियाकलाप प्रमुख युवराज रिमालले जानकारी दिए । राष्ट्रिय टिममा खेलेका उत्कृष्ट खेलाडीहरु समेत खेलिरहेको प्रतियोगिता हेर्न भलिबल खेलप्रेमीहरुको उत्साहजनक सहभागिता रहेको छ । यसअघिका ४ संस्करण मध्ये तीन संस्करण लगातार कुंवरवर्तीले जितेर ह्याट्रिक गरेको थियो भने चौथो संस्करण एभरेष्ट बोर्डिङ बुटवलले जितेको थियो ।