खोज

बुटवल, २० मंसिर । बुटवल कालिका क्याम्पसको १० औ वार्षिकोत्सब तथा अभिभावक दिवसको अवसरमा आयोजित सप्ताहब्यापी खेल सप्ताह २०८० अन्तरगत बुधबार विभिन्न खेलहरु सम्पन्न भएका छन । प्रतियोगिता अन्तरगत टेबलटेनिस छात्रतर्फको खेलमा बिबिएस प्रथम वर्षका सुलभ तिवारी प्रथम भएका छन । उनले फाईनलमा बिबिएस तेस्रो वर्षका विश्वास पौडेललाई पराजित गरेका छन । यसैगरि पहिलो वर्षकै अनमोल उमरामगर तेस्रो भए ।
छात्रातर्फ बिबिएस प्रथम वर्षकी अनु राना प्रथम भएकी छिन । उनले फाईनल खेलमा प्रथम वर्षकै करिना आचार्यलाई पराजित गरिन । बिबिएस तेस्रो वर्षकी अस्मिना पाण्डे खेलमा तेस्रो स्थान हासिल गरेकी छिन ।

यसैगरि कबड्डी छात्रामा बिबिएस पहिलो वर्षको टिम विजेता भएका छन । बुधबार भएको फाईनल खेलमा बिबिएस चौथो वर्षको समुहलाई पराजित गर्दै उपाधि हात पारेका हुन । यसअघि भएको पहिलो सेमीफाईनल खेलमा बिबिएस चौथो वर्षको समुहले प्रथम वर्षको समुहलाई र दोस्रो सेमीफाईनलमा बिबिएस प्रथम वर्षको समुहले बिएड तेस्रो वर्षको समुहलाई पराजित गर्दै फाईनलमा प्रवेश गरेका थिए ।
बुधबार भएको सास्कृतिक नृत्य प्रतियोगितामा इच्छा मल्ल, निरजला चौधरी, सृजना आलेमगर र सीता थापाको समुह प्रथम भएका छन । यसैगरि प्रकृति पौडेल, रिता पोखरेल, सन्ध्या ढकाल र समिक्षा कुवरको समुह दोस्रो तथा युवा बेल्बासे, लक्ष्मी सापकोटा, पुजा पोखरेल, करिश्मा थापा, अस्मिता क्षेत्री र अजिता भुषालको समुह तेस्रो भएका छन ।

छात्र भलिबलको उपाधि बिबिएस तेस्रो वर्षका समुहले हात पारेका छन । बुधबार भएको फाईनल खेलमा बिबिएस तेस्रो वर्षका समुहले बिबिएस दिवा समुहलाई २—० को सोझो सेटमा पराजित गरेको थियो ।
यसैगरि छात्र कबड्डीको उपाधिका लागि बिबिएस दोस्रो वर्ष र बिबिएस तेस्रो वर्षको टिम बिचमा बिहिबार खेल हुने छ । छात्रा भलिबल र क्रिकेटको फाईनल खेल बिहिबार हुने खेल संयोजक रेश्मीराज शर्माले बताए ।
सप्ताहब्यापी कार्यक्रम अन्तरगत बिहिबार हाजिरी जवाफ प्रतियोगिता, अन्तर कलेज प्रस्तुत प्रतिस्पर्धा, रक्तदान कार्यक्रम, निशुल्क आँखा जाँच शिविर, निशुल्क दन्त परिक्षण समेत गरिने बिबिएस संयोजक बुद्धि चौधरीले बताए । क्याम्पसमा बिबिएस, बिसिए र बिएडमा ३ हजार विद्यार्थीहरु अध्ययरत छन ।