खोज

कपिलवस्तु, २० मंसिर
लुम्बिनी एकिकृत बिकास संस्था (लिडो नेपाल) र नेपाल नेत्र ज्योति संघ तौलिहवा आँखा अस्पताल बिच थप १ सय ७८ जनाको निःशुल्क मोतियाबिन्दु अप्रेशनका लागि सम्झौता भएको छ ।

कतार च्यारिटीको सहयोगमा तिन साताको अबधी भित्र जिल्लाको मायादेवी गाउँपालिका, कपिलवस्तु नगरपालिका र शुद्धोधन गाउँपालिकाको बिभिन्न स्थानमा निःशुल्क आँखा परिक्षण शिविर सञ्चालन गरि शिविरमा भेटिएका मोतियाबिन्दुका बिरामीको निशुल्क आँखाको अप्रेशन गरिने छ । लिडो नेपालका अध्यक्ष अतहर कमाल र नेत्र ज्योति संघ कपिलवस्तु शाखाका अध्यक्ष मनोज श्रीवास्तवले सम्झौतामा हस्ताक्षर गरेका हुन ।
यस अघि गत असोज ९ गते कपिलवस्तु जिल्लाभरका ६ सय ५० जना मोतियाबिन्दुका बिरामीको निशुल्क अप्रेशनका लागि सम्झौता गरिएको थियो । संस्था र संघ बिच ६ सय ५० जनाको मोतियाबिन्दुको शल्यक्रियाको सम्झौता भएको भए पनि सम्झौता गरिएको रकम बचत भएपछि सम्झौता परिमार्जन गरि हाल सम्म ७ सय ३ जनाको मोतियाबिन्दुको अप्रेशन सम्पन्न भएको छ । अब पुनः सम्झौता भएको १ सय ७८ जना सहित कुल ८ सय ८१ जनाको निःशुल्क अप्रेशन हुनेछ । यस अघि ७ सय ३ जनाको अप्रेशन बापतको ४२ लाख १८ हजार र थप १ सय ७८ जनाको १० लाख ६८ हजार गरि कुल ५२ लाख ८६ हजार रूपैया लिडो नेपालले उपलब्ध गराउने छ ।

अप्रेशन गर्न बिरामी छनौट गर्न यस अघि जिल्लाभर पालिकाहरूको समन्वयमा आँखा अस्पतालको स्वास्थ्यकर्मीको टोलीद्वारा आँखा स्क्रिनिङ्ग शिविर सञ्चालन गरिने थियो । शिविरमा उपचार गराउन आउने आँखाका बिरामीलाई समेत निशुल्क उपचार र औषधी सेवा दिईएको थियो । शिविरबाट पहिचान भएका मोतियाबिन्दुका बिरामीको आँखाको शल्यक्रिया तौलिहवा आँखा अस्पतालमा गरिएको थियो ।

यस अघि भएको सम्झौता अनुसार जाँच शिविर र मोतियाबिन्दुको निशुल्क अप्रेसन कार्य समयमै प्रभावकारी रूपमा सम्पन्न भएकाले थप १ सय ७८ जनाको शल्यक्रियाका लागि सम्झौता गरिएको लिडो नेपालका अध्यक्ष अतहर कमालले बताए । आँखा परिक्षण तथा अप्रेशन कार्यक्रम प्रभावकारी भएकाले आगामी दिनमा पनि कतार च्यारिटी मार्फत थप सहयोगलाई प्राथमिकता दिईने उनले प्रष्ट्याए । सामाजिक क्षेत्रबाट जिल्लामै हाल सम्मकै बढि मोतियाबिन्दुको अप्रेशनका लागी दुई पटक गरि लिडो नेपालले सम्झौता गरि सहयोग गरेको नेपाल नेत्र ज्योती संघ तौलिहवा आँखा अस्पतालका अध्यक्ष मनोज कुमार श्रीवास्तवले बताए । आँखा उपचार र शल्यक्रिया सेवालाई प्रभावकारी बनाउन अस्पतालमा नियमित बिशेषत्र डाक्टर मार्फत सेवा दिईदै आएको उनले प्रष्ट्याए ।