खोज

सुनवल, २० मंसिर । नवलपरासीको सुनवल नगरपालिकाले स्थानीय स्वास्थ्य संस्थाबाट पहिलो पटक प्रयोगशाला सेवा सुरु गरेको छ । जिल्लामा तुलनात्मक रूपमा सुगम पालिकाको रूपमा चिनिने सुनवल नगरपालिकामा हालसम्म कुनै पनि स्वास्थ्य संस्थामा प्रयोगशाला सेवा थिएन । सोमबार देखि सुनवल १ मा रहेको शहरी स्वास्थ्य सेवा केन्द्रमा प्रयोगशाला सेवा शुभारम्भ गरिएको नगर प्रमुख बिमला अर्यालले जानकारी दिईन् ।

समान्य परिक्षणका लागि पनि टाढा धाउनुपर्ने बाध्यताको अन्त्य गर्दे स्थानीय स्वास्थ्य संस्थाबाटै प्रयोगशाला सेवा सुरु गरिएको नगरपालिकाले जनाएको छ । आधारभुत प्रयोगशालामा रगत, दिशापिसाब, खकार जाँच सहित विभिन्न ३२ प्रकारका परिक्षण हुने स्वास्थ्य शाखा प्रमुख कृष्ण न्यौपानेले जानकारी दिए । सोमबार जिल्ला समन्वय समितिका प्रमुख भगौति यादव, नगर प्रमुख अर्याल र उपप्रमुख सुर्यप्रसाद दुवेले संयुक्त रुपमा प्रयोगशालाको शुभारम्भ गर्दे यसले नगरको स्वास्थ्य सेवाको अवस्था सुधारमा महत्वपुर्ण टेवा पु¥याएको बताएका छन् । जिसस प्रमुख यादवले नगरपालिकाले न्यूनतम शुल्क लिएर प्रयोगशाला सेवा दिनुपर्ने र उक्त शुल्क स्वास्थ्य संस्थाकै अवस्था सुधारमा प्रयोग गर्नुपर्नेमा जोड दिए ।

नगर प्रमुख अर्यालले नगरभित्रका स्वास्थ्य संस्थामा प्रयोगशाला नहुँदा आम नागरिकले समस्या खेपिरहेको समयमा विभिन्न निकायको सहयोगमा प्रयोगशाला सेवा सुरु गर्न सम्भव भएको बताइन् । नेकपा एमालेका नगर अध्यक्ष दुर्गा सुवेदीले प्रयोगशाला सेवाको सुरुवात सुखद पक्ष रहेको बताउँदै स्वास्थ्य संस्थामा निःशुल्क पाईने औषधिको उपलब्धता बढाउनुपर्नेमा जोड दिए ।

नगरपालिकाको सामाजिक विकास समिति संयोजक भगवती बस्यालले नगरपालिकाको स्वास्थ्य क्षेत्र बिस्तारै सुधारिदै गएको उल्लेख गरिन् । नगरपालिकाले पालिकाका सबैलाई पायक पर्ने गरी वडा नम्बर १२ मा रहेको स्वास्थ्य संस्थामा पनि प्रयोगशाला सेवा सुरु गर्ने तयारी गरेको प्रमुख प्रशासकिय अधिकृत चेतनाथ गिरीले जानकारी दिएका छन् । प्रयोगशाला संञ्चालन गर्न ईन्द्रिेणी, फेयरमेड लगाएतका गैरसरकारी निकायले नगरपालिकालाई सहयोग गरेका छन् । सुनवल १ मा रहेको शहरी स्वास्थ्य सेवा केन्द बर्थिङ्ग सेन्टर पनि भएकाले प्रयोगशाला सेवा सुरु भएसंगै धेरै सहज हुने स्थानियले बताएका छन् ।