खोज

बुटवल, १६ मंसिर ।

अखिल नेपाल फुटबल संघ (एन्फा) मा पदाधिकारीको खिचलो, खेलाडी छनौटदेखि सिफारीससम्म नाताबाद र कृपाबादको भुमरीमा नेपाली फुटबल फस्दा झन पछि झन कमजोर भएको छ ।

यस्तोमा एन्फाका पुर्व अध्यक्ष गणेश थापा फुटबलमा आमूल परिवर्तनको नारा बोकेर देश दौडाहामा हिडेका छन । ‘हाम्रो अभियान, नेपाली फुटबलमा आमूल परिवर्तन’ नारासहित रुपन्देही फुटबल अभियन्ताहरुको आयोजनामा शनिबार फिफा तथा एएफसी, एन्फासंग आवद्घ नभएका खेलाडी तथा खेलप्रेमीहरुसँग परिचयात्मक कार्यक्रमलाई एन्फाका पुर्व अध्यक्ष तथा एएफसीका पुर्व उपाध्यक्ष, नेपाली राष्ट्रिय फुटबल टिमका पुर्व कप्तान गणेश थापाले सम्बोधन गर्दै झन् पछि झन नेपाली फुटबल खस्किएको दाबी गरे ।

फुटबललाई माया गर्ने देशको कुना काप्चामा कमी नरहेको भन्दै उनले फिफाको गोल प्रोजेक्ट अन्तरगत आफनो समयमा धरान बुटवल, र च्यासलमा शुरु भएको स्मरण गराए । ‘तत्कालिन समयमा खेल अगुवाहरुकोे सक्रियताकै कारण फुटबलको पुर्वाधार सफल भएको थियो’— उनले भने । १० वर्ष अघि र अहिलेको तुलना गर्दा खेल र खेलाडीहरुको अवस्था झन कमजोर र दयनीय भएको उनले बताए ।

नेपाली फुटबलमा सबै मिलेर एकपटक परिवर्तन ल्याउन जरुरी रहेको उनले औल्याए । ‘यो अभियानमा सबै जुटौ’— उनले आग्रह गरे । यो भेटघाट अभियान २०८२ मा नेपाली फुटबल आमुल परिवर्तन हुने विद्रोहको तयारी भएको दाबी गर्दै विद्रोहको आगोमा एन्फा पदाधिकारीहरु जल्ने उनले बताए । आफनो पालामा अढाई लाख डलर सहयोग आउने गरेकोमा अहिले ८० लाख भन्दा बढी डलर आउने गरेको भएपनि कुनै नया परियोजना चलाउन नसकेको उनले दुखेसो गरे । यसरी एन्फा चल्न नसक्ने उनले ठोकुवा गरे ।

पदका लागि पुरानाले छोड्ने र नयालाई बाटो खुला गराउनुपने सुझाव दिए । आफु अब फुटबल संस्थाको अध्यक्ष बन्ने सोच लिएर नहिडेको भन्दै आफ्नो २०८२ सम्म प्रतिबन्ध रहेको हुदा त्यसपछि युवा वर्गमा नेतृत्व हस्तान्तरण गर्नुपर्छ भन्ने सोचका साथ आफू लागेको बताए । आफ्नो समयमा खेलाडीहरु वर्षभरि नै खेल्ने अवसर पाउथे तर अहिले ३ महिना पनि खेल्न नपाउने अवस्था आएको उनले बताए ।

यसले खेलाडीमा पलायनको अवस्था ल्याएको उनको दाबी छ । खेलाडीहरुले अन्तर्राष्ट्रिय प्रतियोगिता जिते पुरस्कार दिनुपर्ने डर एन्फा पदाधिकारीहरुमा रहेको भन्दै उनले बरु पदाधिकारीहरु भने भत्ता सुविधा भने बढ्दो रहेको दाबी गरे । यता खेलाडीहरुलाई ३ महिनाको तलबबाट जिविका चलाउनुपर्ने बाध्यता रहेको उनले बताए । ६ वर्षदेखि निरन्तर एन्फा पारदर्शीताको घेरामा परेको भन्दै उनले आर्थिक अनियमताकै कारण फिफाको नाकाबन्दीमा समेत परेको बताए ।

कार्यक्रममा नेपाल खेलकुद पत्रकार मंच रुपन्देहीका अध्यक्ष सुमन अधिकारीले खेलकुदको अहिलेको अवस्थाबाट उकास्न गणेश थापा खोजिरहेको बताए । फुटवलमा विवाद हैन विकास खोजेको भन्दै यसमा ध्यान दिनुपर्ने उनले बताए । रुपन्देही बिना नेपाली फुटबलको ईतिहास अधुरो हुने भन्दै उनले फुटबल पछि पर्नुको कारण खोजी गरी समाधानमा लाग्न सुझाव दिए । एन्फा राष्ट्रिय रेफ्री अमर पुनले फुटबलको विकास गर्न ढिला भएको भन्दै अब एकजुट भएर लाग्नुपर्ने बताए ।

फुटबललाई माया गर्ने सबै एन्फा हुने भन्दै फुटबलको विकासमा सबै लाग्नुपर्ने उनले बताए । आफन्तवाद र कृपावादकै कारण नेपाली फुटबल पछि परेको उनले दुखेसो गरे । फुटबल राम्रो बनाउन सबै एकजुट भएर लाग्नुपर्ने उनले सुझाव दिए । ‘रुपन्देही फुटबलमा देखिएको विकृति हटाउन जरुरी छ’–उनले भने । कार्यक्रममा संयोजक दिपक श्रीषले फुटबललाई बचाउने अभियानको संकल्प रुपन्देहीबाट आफुहरुको अगुवाईमा थालिएको बताए ।

कार्यक्रममा अखिल फुटबल संघका पुर्व केन्द्रीय उपाध्यक्ष महेन्द्र हमाल, रुपन्देही फुटबल संघका पुर्व अध्यक्ष हरि प्रसाद श्रेष्ठ, राष्ट्रिय युवा परिषद बोर्ड सदस्य तथा तिलोत्तमा नगरपालिका कार्यपालिका सदस्य रवि सेन्चुरी, क्याप्टेन नरजंग गुरुङ, किशन थापा, सतिश भण्डारीले फुटबलको विकासको रोकिएको गतिलाई सबै सरोकारवालाहरुको अगुवाईमा फेरि अगाडी बढाउने समय आएको बताए ।