खोज

तिलोत्तमा,६ मंसिर । तिलोत्तमाको मणिग्राममा सञ्चालन भइरहेको औद्योगिक व्यापार मेलामा बुधबारदेखि कुस्ती (दंगल) प्रतियोगिताको रमाइलो शुरु भएको छ । मेला आयोजक तिलोत्तमा उद्योग बाणिज्य संघले पहिलोपटक मेलास्थलमा कुस्ती प्रतियोगिता शुरु गरेको हो । मेलाको सांस्कृतिक कार्यक्रम हुने स्टेज अगाडि बुधबार उद्घाटन भएको कुस्ती प्रतियोगिता तीन दिनसम्म चल्ने छ । कुस्ती पप्रतियोगितामा नेपाल र भारतका पुरुष र महिला गरी १६ जना पहलमान खेलाडीहरुले प्रतिस्पर्धा गर्ने खेल संयोजक रुस्तम कंडेलले जानकारी दिए । हरेक दिन दिउसो ३ बजेदेखि ५ बजेसम्म हुने कुस्ती प्रतियोगिता निःशुल्क हेर्न पाइने मेला आयोजकले व्यवस्था गरेका छन् । माटोको समथर थुम्कोमाथि पहलमानहरु भित्री वस्त्र मात्र लगाएर खेल्ने कुस्ती खेल ब्यापार मेलाको नौलो र रोचक आकर्षण बनेको दर्शकहरुको प्रतिक्रिया छ ।
कुस्ती खेलेको लाइभ हेर्न पाउंदा बेग्लै रमाइलो लागेको स्थानीय बुद्धिजिवी पशुपति घिमिरेले बताए । ‘कुस्ती नेपालको तराई क्षेत्रको संस्कृतिसँग जोडिएको लोकप्रिय खेल हो, तर संरक्षण नहुंदा लोपोन्मुख अवस्थामा पुगेका बेला तिलोत्तमा उद्योग बाणिज्य संघले मेलामै कुस्ती प्रतियोगिता आयोजना गर्नु ज्यादै सकारात्मक पक्ष हो’–घिमिरेले भने–‘यसले मेलामा आउने दर्शकलाई पनि नौलोपन दिएको छ ।’

कुस्ती खेलको संरक्षण र कुस्तीका खेलाडीको प्रोत्साहनका लागि संघले आफ्नो मेलामा पहिलोपटक कुस्ती प्रतियोगिता आयोजना गरेको र यसलाई आगामी मेलामा पनि निरन्तरता दिइने संघका अध्यक्ष गुणनिधि भण्डारीले बताए ।
कुस्ती प्रतियोगितामा प्रथम,दोस्रो,तेस्रो हुनेले क्रमशः २०,१५ र १० हजार नगद पुरस्कार पाउने र दर्शकबाट छुट्टै इनाम (नगद ) पनि पाउने मेला आयोजक संस्थाका उपाध्यक्ष सुरज पंगेनीले बताए ।

मनोरञ्जनसँगै शारीरिक र मानसिक तन्दुरुस्तीका लागि कुस्ती खेल निकै उपयोगी मानिन्छ ।
यसैबीच बुधबार नै सांस्कृतिक कार्यक्रमतर्र्फ लोकदोहोरी गायिका रिता थापा,कृष्णा गुरुङ,युवराज भुसाल,दीपक खड्का,शिला गुरुङ,रयापर अफिमको प्रस्तुति रहेको थियो । यस्तै तिलोत्तमा लोक तारा,आमा नृत्य,विद्यालयस्तरीय लोक नृत्य प्रतियोगिताले पनि दर्शकलाई मनोरन्जन दिलाएको थियो । मंसिर १२ सम्म चल्ने मेलामा २ सय बढी स्टल रहेका छन् । मेलामा कृषिजन्य,गार्मेन्टका स्टलहरुमा उपभोक्ताको आकर्षण छ