खोज

बुटवल, ४ मंसिर । दोस्रो संस्करणको नेपाल सुपर लिग २०८० (एनएसएल) को तयारीमा रहेको बुटवल लुम्बिनी एफसीले मैत्रीपुर्ण दुई खेलमा धनगढी एफसीमाथि जित निकालेको छ । प्रि सिजन खेलका रुपमा बुटवल लुम्बिनी एफसीको आयोजनामा सोमबार देवीनगरस्थित एन्फा एकेडेमीको घरेलु खेलमैदानमा भएको दोस्रो खेलमा बुटवल लुम्बिनी २—१ गोलको जित निकालेको हो । यसअघि शनिबार भएको पहिलो खेलमा बुटवल लुम्बिनीले १—० गोलको जित निकालेको थियो ।

सोमबार भएको निक्कै प्रतिस्प्रर्धात्मक खेलको २७ मिनेटमा धनगढी एफसीका फाल्बु डियगनाले कर्नर प्रहारलाई सदुपयोग गर्दै गोल गरेका थिए । टिमका मार्कि खेलाडी समेत रहेको फाल्बु विश्व फुटबलका महान खेलाडी मेस्सीसंग खेलेका खेलाडी हुन । आर्कषण खेल प्रदर्शन गरेर घरेलु टिमलाई दबाबमा राखेको धनगढीले ३९ औ मिनेटमा गोल खान पुग्यो । बुटवल लुम्बिनी एफसीका विदेशी खेलाडी स्टमिन गिलले बराबरी गोल गरे । उनले धनगढीका डिफेन्स लाईनलाई छकाउदै आकर्षक गोल गरे । दोस्रो हाफमा मैदान छिरेका बुटवल लुम्बिनी एफसीका चन्दन दासले विजयी गोल गरे । खेलको ईन्जुरी समयमा गोल गर्दै टिमलाई विजयी बनाए ।

निरन्तर अभ्यास खेल खेलाउदा खेलाडीमा आत्मबल बढ्ने बुटवल लुम्बिनीका प्राविधिक प्रमुख याम बहादुर गुरुङ बताउछन । खेलाडीहरुका बिचमा आत्मियता विकाससंगै खेल सीप सिकाईमा यस्तो प्रतियोगिताबाट फाईदा मिल्ने उनको दाबी छ । ब्यवसायिक फुटबलको रुपमा अघि बढेको यो सिजनको प्रतियोगितासंगै नेपाली फुटबल विकासमा टेवा पुग्ने उनी बताउछन ।

दोस्रो संस्करणको एनएसएल मंसिर ८ गते शुभारम्भ हुने छ । पहिलो संस्करण खेलेका टोलीमध्ये विराटनगर सिटी एफसी बाहिरिँदा नयाँ दुई टोली गरी ९ टोलीले प्रतियोगितामा सहभागिता जनाउने तालिकासमेत सार्वजनिक गरेको छ । पहिलो सिजनमा धनगढी फुटबल क्लबलाई हराउँदै काठमाडौँ रेजर्सले उपाधि जितेको थियो ।