खोज

रुकुम पश्चिमको सानीभेरी गाउँपालिकाकी उपाध्यक्ष कमला रोका पुनले भूकम्पबाट घाइतेको अवस्था गंभीर रहेको बताएकी छिन् । उनले पालिकाको वडा नम्बर १, २ र ४ गरी तीन वटा वडामा मृत्यु हुनेको संख्या १२ पुगिसकेको बताइन । उनका अनुसार थप घाइतेहरूको अवस्था पनि गम्भीर नै छ । सिकिस्त भएका घाइतेहरूलाई हेलिकप्टरमार्फत सुर्खेत पुयाउने क्रम जारी छ ।

अहिलेसम्म सयौं घाइतेको उद्वार गरिएको उनले बताइन् । ‘रातिदेखि अहिलेसम्म हाम्रो प्राथमिकता उद्वार र शव व्यवस्थापन नै थियो,’ उनले थपिन्, ‘अब हामी राहतको काममा लाग्छौं । अहिलेसम्म मानिसहरू खानासमेत नपाएर भोकभोकै बसेका छन् ।’

पालिका भित्रका कुल ५ हजार घरधुरीमध्ये ३ हजार ५ सय घरधुरी प्रभावित भएको उनले बताइन् । ‘३ हजार ५ सय घर भित्र बस्न नसकिने अवस्थामा छन् । ५ सय कच्ची घर पूर्ण रूपमा भत्किएका छन्,’ उनले भनिन, ’हाम्रो पालिका नै क्षतविक्षत भएको छ । अस्तव्यस्त छ ।’
खाद्यान्न सामग्रीदेखि बस्न पालसमेतको अभाव भएकाले सबैसँग उनले सहयोग मागेकी छिन् । ’हामी अहिलेसम्म घाइते उद्वार र शव व्यवस्थापनमै केन्द्रित थियौं ।

त्यसैले राहतका लागि खाद्यान्न, बस्नका लागि पाल र अन्य लजिस्टिक सामान जुटाउन सकेका छैनौं, ‘उनले थपिन्, ‘प्रदेश सरकार, संघ सरकारदेखि सबैले निकायले पालिकाहरूलई सहयोग गरिदिनु प¥यो ।’