खोज

लमही (बुटवलटुडे), २३ असोज– दाङ र रोल्पाको सीमानामा पर्ने रानीवास स्थित ग्वारखोलामा पुल निर्माणको माग गर्दै लुम्बिनी प्रदेशका मुख्यमन्त्रीलाई ध्यानाकर्षण पत्र बुझाइएको छ । बिजौरी उद्योग वाणिज्य संघले सोमबार लुम्बिनी प्रदेशका मुख्यमन्त्री डिल्लीबहादुर चौधरीको कार्यालयमा पुगेर ध्यानाकर्षण पत्र बुझाएको हो ।

“होलेरी ग्वारखोला हुँदै तुलसीपुर” सडक–खण्डको रोल्पाको रुण्टीगढी गाँउपालिकाको वडा नं. ६ र ८ जोड्ने तुलसीपुर उपमहानगरपालिका वडा नं. १९ को सिमाना रानीवास स्थित ग्वारखोलामा पक्की पुल नहुँदा त्यहाँका स्थानीयले आवतजावतमा वर्षौंदेखि समस्या खेप्दै आएका छन । ‘पुल नभएकै कारण वर्षायामको समयमा यातायात तथा पैदल हिँड्ने यात्रुहरूलाई आवागमनमा निकै समस्या भएको हुँदा उक्त स्थानमा पक्की पुल निर्माण गर्नका लागि आवश्यक व्यवस्था गरिदिनुहुन अनुरोध छ,‘ध्यानाकर्षण पत्रमा भनिएको छ ।’ ध्यानाकर्षण पत्र बुझ्दै मुख्यमन्त्री चौधरीले पुल निमार्णको प्रक्रिया तत्काल अघि बढाउन भौतिक पूर्वाधार मन्त्रीलाई आदेश दिएका छन । त्यस अबसरमा बिजौरी उद्योग वाणिज्य सघंले सोलार बत्ती, सिसि क्यामेरा जडानका लागि आवश्यक व्यवस्था गरिदिन मुख्यमन्त्रीलाई आग्रह गरेको महासचिव दीपक कुमार बस्नेतले बताए ।

चौधरीले सोलार बत्ती जडानमा सहयोग गर्ने बताए । तर उनले त्यसको महसुल भने व्यवसायीहरू आफै मिलेर तिर्नुपर्ने बताए । साथै घोराही देखि तुलसीपुरसम्मका मुख्य बजारहरूमा जिल्ला प्रहरी कार्यालय दाङले जिल्लाबाट निगरानी हुने गरि सिसि क्यामेरा जडान गर्न थालेको मुख्यमन्त्री चौधरीले बताए ।