खोज

बर्दघाट, १८ असोज ।

तेह्रौँ सँस्करणको विश्वकप क्रिकेट प्रतियोगिता बिहीबारबाट सुरु भएको छ । कुनै पनि औपचारिक कार्यक्रम र तामझाम विना विश्वस्तरको प्रतियोगिता सुरु भएको यो पहिलो घटना हो ।

उद्घाटन कार्यक्रममा भारतीय कलाकारहरु रणविर सिँह, अरिजित सिँह, तमन्ना भाटिया, वरुण धवन, शँकर महादेवन लगायतका कलाकारहरुले प्रस्तुति दिने बताइएपनि कुनै पनि साँगितिक कार्यक्रम र आतिशबाजी भएको थिएन । १३ औँ सँस्करणको विश्वकप क्रिकेटको उद्घाटन खेल १२ औँ सँस्करणको विजेता इङ्ल्याण्ड र उपविजेता न्युजिल्याण्डविच भारतको अहमदावादस्थित नरेन्द्र मोदी क्रिकेट रँगशालामा सम्पन्न भएको थियो ।

उद्घाटन खेलमा विश्व विजेता टोली इङ्ल्याण्डले ९ विकेटको फराकिलो अन्तरले पराजय भोगेको छ । टस हारी पहिले ब्याटिङ गरेको इङ्ल्याण्डले निर्धारित ५० ओभरमा ९ विकेट गुमाएर २ सय ८२ रन जोडेको थियो । उसका लागि जोय रुटले ७७ रन बनाउँदै अर्धशतकीय पारी खेलेका थिए । कप्तान जोश बटलरले ४३ र ओपनर जेनी वेरिष्टले ३३ बाहेक अन्यको प्रदर्शन भने फितलो रह्यो ।

न्युजिल्याण्डका म्याट ह्यारीले इङ्ल्याण्डका ३ खेलाडीलाई पेवेलियनको बाटो देखाएका थिए । ग्लेन फिलिप र मिचेल स्यान्टनरले समान २—२ विकेट लिएका थिए । २ सय ८३ रनको लक्ष्य पच्छाएर प्रतिउत्तरमा ब्याटिङ गर्न मैदानमा उत्रिएको न्युजिल्याण्डले निर्धारित ५० ओभरको खेलमा ८२ बल बाँकी छँदै १ विकेट गुमाएर लक्ष्य भेटाएको थियो ।

न्युजिल्याण्डले सुरुवाती विकेट दोश्रो ओभरमै टिम स्कोर मात्र १० हुँदा गुमाएको थियो । ओपनर ब्याटर विल योङ शुन्य रनमै पेवेलियन फर्केका थिए । ओपनर ब्याटर डेभोन कन्भे र रचिन रविन्द्र आक्रामक खेल प्रदर्शन गर्दै दोश्रो विकेटको लागि २ सय ७३ रनको साझेदारीमा टिमलाई जित दिलाउन महत्वपूर्ण योगदान गरे । कन्भेले १ सय २१ बल खेल्दै ३ छक्का र १९ चौकाको मद्दतले अविजित १ सय ५२ र रविन्द्रले ९६ बलमा ५ छक्का र ११ चौकाको मद्दतमा अविजित १ सय २३ रन प्रहार गर्दै दुबै खेलाडीले सतक प्रहार गरेका थिए । शुक्रबारको खेल नेदरल्याण्डस र पाकिस्तानविच दिउँसो सवा २ बजे हैदराबादमा हुनेछ ।