खोज

बुटवल, १० असोज । ईस्लाम धर्मावलम्बीहरुको धर्मगुरु पैगम्बर हजरत मुहम्मद मुस्तफा स्वल्ललेलाहो अलैहे वसल्लमको १४९८ औ शुभ जन्मोत्सव (यौमे बिलादत) को अवसरमा बुधबार नेपाल अपाङ आश्रम बुटवल देविनगरमा खाद्यान्न वितरण गरिएको छ । एक समारोहका बिच रजा ए मुस्तफा जामे मस्जिद समितिका अध्यक्ष हाजी मोहमद इस्माईल, वरिष्ठ उपाध्यक्ष हाजी अब्दुल सहमतले चामल, दाल, नुन, तेल, चाउचाउ लगायत करीब १० हजार रुपैयाभन्दा बढीको दैनिक उपभोग्य सामग्री आश्रमका अध्यक्ष डोल बहादुर रामदामलाई हस्तान्तरण गरे ।

सहयोग हस्तान्तरण गर्दै समितिका अध्यक्ष हाजी मोहमद इस्माईलले इस्लाम धर्ममा सामाजिक उत्तरदायित्वलाई प्राथमिकता दिएको भन्दै आफनो समुदायका सबैजसो वर्षभरि कमाएको मध्येबाट दान गर्ने परम्परालाई पालना गर्दै आएको बताए । यो वर्ष पैगम्बरको जन्मदिनमा विविध कार्यक्रम अन्तरगत आश्रममा सहयोग गरिएको उनले बताए । बुधबार साझ मुस्लिम समुदायहरुको बिचमा मिलादुननबी कार्यक्रम राखिएको समेत उनले बताए ।

कार्यक्रममा आश्रमका अध्यक्ष डोल बहादुर रामदामले शारिरिक र मानसिक अपाङता भएकाहरुप्रतिको दृष्टिकोण परिवर्तन गर्न जरुरी रहेको बताए । अपाङताकै कारण घरपरिवारबाट अपहेलित हुदा धेरै जना आश्रममा आश्रय लिनुपर्ने बाध्यता रहेको उनले दुखेसो गरे । आश्रममा रहेका ४० जना मध्ये प्रगति माबि, गार्गी बोर्डिङ स्कुल, मणिमुकुन्द स्कुलमा अध्ययन गर्ने ८ जना कक्षा नसरी देखि १० कक्षासम्म अध्ययरत छन । आश्रममा बेलाबेला हुने सहयोगबाट नै दैनिकी चलेको उनले बताए । न्युनतम दैनिक खाद्यान्नमा १५ हजार रुपैया बराबर खर्च हुने भन्दै उनले जन्मदिन, विवाहउत्सव, विभिन्न तिथिहरुमा दाताहरुको सहयोग मुख्य श्रोत भएको बताए ।

कार्यक्रममा समितिका वरिष्ठ उपाध्यक्ष हाजी अब्दुल सहमतले इस्लाम धर्मावलम्बीहरुको ठुलो चाडलाई रचनात्मक रुपमा मनाउने गरि यो वर्ष फरक कार्यक्रमहरु गरिएको भन्दै ईस्लामिक अन्तर विधालय हाजिरी जवाफ प्रतियोगिता, आश्रमलाई सहयोगका कार्यक्रम सम्पन्न भएको बताए । बुधबार साझ मिलादुननबी र बिहिबार बिहान जन्मजयन्तीको खुशियालीमा बाजागाजासहित बजार परिक्रम कार्यक्रम हुने उनले बताए । हाल बुटवल उपनगरपालिकामा ५ हजार ईस्लाम धर्मावलम्बीहरु समुदायमा रहेका छन ।