खोज

काठमाडौं,१० असोज । नेकपा एमाले बाग्मती प्रदेश अधिवेशनमा आज बुधबार बिहान ८ बजेदेखि निर्वाचनका कार्यक्रम शुरू भएको छ । ९ बजे उम्मेदवारी दर्ता र त्यसपछि निर्वाचन प्रक्रिया क्रम अनुसारको तालिका रहेको नेता रामेश्वर फुयालले बताए ।

निर्वाचन केन्द्रीय कार्यालय ललितपुरको तुल्सीलाल प्रतिष्ठानमा हुने जानकारी उनले दिए । साढे ११ सय प्रतिनिधि सहभागी हुने निर्वाचन विद्युतीय मेसिनबाट हुनेछ । निर्वाचन तालिका आए पनि अन्तिमसम्मै सहमतिको प्रयास हुने जानकारी उनले दिए ।

एमाले प्रदेश अध्यक्षका लागि रामेछापका कैलाश ढुंगेल र मकवानपुरका कृष्ण दाहाल मुख्य दाबेदार छन् । तर सहमति हुँदा निवर्तमान अध्यक्ष केशव पाण्डे, कृष्णभक्त पोखरेलदेखि सानु श्रेष्ठसम्मको दाबेदारी रहेको बताइन्छ ।

पार्टी नेतृत्वले सहमतिका लागि निरन्तर प्रयास गरे पनि निर्वाचनतिरै धेरैले जोड दिएका छन् । पार्टी अध्यक्ष केपी शर्मा ओलीले निर्वाचनमा जांदा प्यानल बनाएर नजान र गएमा उम्मेदवारी खारेज हुनसक्ने चेतावनी दिएका छन् ।

एमालेमा अध्यक्ष, उपाध्यक्ष र सचिव एकएक जना, दुई उपसचिवसहित २४० सदस्यीय कमिटी चयन हुँदैछ । यस अघि लुम्बिनीमा पनि निर्वाचनबाटै मुख्य नेतृत्व चयन भएको थियो ।