खोज

बर्दघाट, ३१ भदौ ।

एसियाकप क्रिकेटको फाईनल उपाधिका लागि आज (आइतबार) भारत र श्रीलँका आमनेसामने हुँदैछन् । १६ आँै सँस्करणको फाइनल खेल श्रीलँकाको प्रेमदाशा स्टेडियममा खेलिँदैछ ।

सन् १९८४ मा पहिलो पटक आयोजना भएको प्रतियोगिताको १६ औँ सँस्करणसम्म आइपुग्दा भारत सर्वाधिक धेरै पटक उपाधि विजेता बनेको छ । उसले ७ पटक उपाधिमा कब्जा गरेको छ भने ३ पटक उपबिजेता बनेको छ । त्यस्तै श्रीलँकाले ६ पटक उपाधि चुम्दा ६ पटक नै उपविजेता बन्न पुगेको थियो ।

भारत र श्रीलँकाबीच अहिलेसम्म १ सय ६६ पटक एकदिवसीय क्रिकेटमा आमने सामने भएका छन् जसमा भारतले ९७ पटक जित निकालेको छ भने श्रीलँकाले ५७ पटक भारतलाई पराजित गरेको छ । जारी १६ औँ सँस्करणमा भारत, पाकिस्तान र नेपाल समूह ए र श्रीलँका, बँगलादेश र अफगानिस्तान समुह बी मा विभाजित भइ सुपर फोर चरण प्रवेशका लागि लिग खेल खेलेका थिए ।

समुह ए बाट भारत र पाकिस्तान, यस्तै समूह बि बाट श्रीलँका र बँगलादेश सुपर फोर चरण प्रवेश गरेका थिए । सुपर फोर चरणमा भारतले पाकिस्तान र श्रीलँकालाई पराजित गर्दै फाइनल यात्रा तय गरेको थियो भने श्रीलँकाले बँगलादेश र पाकिस्तानलाई पराजित गर्दै फाइनलमा आफ्नो स्थान सुरक्षित गरेको थियो ।

भारत र श्रीलँका दुबैले सुपर फोरमा १–१ हार ब्यहोरेका थिए । एसियाकपको विगतलाई फर्केर हेर्दा अहिलेसम्म भारत र श्रीलँका २२ पटक आमने–सामने भएका छन । जसमा दुबै टिमले बराबर जित–हार ब्यहोरेका छन । दुबै टिमले ११ जित र ११ हार ब्यहोरेका छन । यसअर्थले पनि २३ औँ भिडन्त रोमान्चक हुने देखिन्छ । एसियाकपको फाइनलमा प्रभाव पार्न सक्ने ५ खेलाडीको सूचीमा भारतका रोहित शर्मा, कुलदिप यादव, जसप्रित बुमराह रहेका छन् भने श्रीलँकाका कुशल मेन्डीस र दुनिथ बेल्लालागे रहेका छन् । जारी एसियाकपमा रोहित शर्माले ५ खेलबाट १९४ रन बनाएका छन भने श्रीलँकाका मेन्डीसले ५ खेलमा २५३ रन बनाएका छन । बलिङ्गतर्फ भारतका स्पिनर कुलदिप यादव र श्रीलँकाका बेल्लालागे निकै सफल रहेका छन् । तीव्र गतिका बलर जसप्रित बुमराह भारतको मुख्य बलरका रुपमा रहेका छन् ।