खोज

बुटवल, ३० भदौ ।

न्यु लुम्बिनी ब्याडमिन्टन क्लबका खेलाडीहरुबीच खेल विकास गर्न आन्तरिक प्रतियोगिता २०८० सम्पन्न भएको छ । खेलाडीको रेकिङ अनुसार क्लबका सदस्यहरुको ३ समूहमा विभाजन गरेर शनिबार क्लबमा प्रतियोगिता खेलाईएको हो ।

प्रतियोगिता अन्तर्गत दीप आचार्य र दिपक अधिकारी क्षेत्रीको जोडी, समूह (बी) मा दिनेश कुमार प्रधान र बोम बहादुर थापाको जोडी र उमाशंकर मालपानी र प्रेम न्यौपानेको जोडी विजयी भए ।

न्यू ब्याडमिन्टन क्लबको हलमा भएको समूह (ए) को फाईनलमा दीप आचार्य र दिपक अधिकारी क्षेत्रीको जोडीले बोनिन पिया र किरण थापाको जोडीलाई २–१ को सेटमा जित निकाल्दै उपाधि जिते । प्रतिस्पर्धात्मक खेलको पहिलो सेट पिया र थापाको जोडीले २१–१८ को अंकले जित निकाले । तर दोस्रो सेट आचार्य र अधिकारीको जोडीले खेल २१–१४ को अंकले जित निकाल्दै खेल बराबरीमा ल्याए । तेस्रो सेटमा आचार्य र अधिकारीको जोडीले खेल २१–१५ को सेटमा जित निकाल्दै उपाधि जिते । समूह ए मा रोहित पुरी र नारायण तिवारीको जोडी तेस्रो भए ।

यसैगरी समूह (बी) मा दिनेश कुमार प्रधान र बोम बहादुर थापाको जोडीले कमल ज्ञवालीले र रमेश पाण्डेको जोडीलाई २–० को सेटमा पराजित गर्दै प्रथम भएका छन् । कमल ज्ञवालीले र रमेश पाण्डेको जोडी उपविजेतामा चित्त बुझाए । समूहमा नरेश कुमार श्रेष्ठ र दल बहादुर गाहा तेस्रो भए ।

समुह (सी) मा उमाशंकर मालपानी र प्रेम न्यौपानेको जोडीले फाईनल खेलमा महेन्द्र ध्वजु र कृष्ण खनालको जोडीलाई २–१ को सेटमा पराजित गर्दै विजेता बने । महेन्द्र ध्वजु र कृष्ण खनालको जोडी उपविजेतामा चित्त बुझाए । यसैगरी यो समूहमा धनकुमार श्रेष्ठ र हरिशंकर गुप्ता र दिलिप सापकोटा र विजय खनाल तेस्रो भए ।

प्रतियोगितामा समूह (सी) मा ४ टिम, (बी) ११ टिम र (ए) मा ६ टिमले भाग लिएको क्लबका सहकोषाध्यक्ष तथा संयोजक गोविन्द श्रेष्ठले बताए ।

कार्यक्रममा क्लबका अध्यक्ष बोनिन पियाले खेल सबै उमेर समूहलाई आवश्यक पर्ने भन्दै खेलकुद शारीरिक र मानसिक विकासमा मद्दत मिल्ने बताए ।

एक समारोहका बीच प्रदेश खेलकुद परिषद लुम्बिनीका सदस्य सचिव जय प्रकाश भट्टराईले विजेता, उपविजेता टिमलाई पुरस्कार वितरण गर्दै नियमित खेलकुद गतिविधि र प्रतियोगिताबाट नै खेल विकास हुने बताए । यसमा सरोकारवाला निकाय खेल विकासमा लाग्नुपर्ने उनले सुझाव दिए । नेपालमा ब्याडमिन्टन खेलको लोकप्रियता बढेको भन्दै नेपालमा सरकारको प्राथमिकताको ११ खेलमा ब्याडमिन्टन पर्ने उनले बताए ।

कार्यक्रममा महासचिव जीवकान्त काफ्लेले ब्यस्त जीवनबाट समय निकालेर खेल खेल्दा फाईदा मिल्ने बताए ।