खोज

बुटवल,१६ भदौ । नेकपा एमाले लुम्बिनी प्रदेशको पहिलो अधिवेशनमा नेता कार्यकर्ताको उत्साहजनक सहभागिता देखिएको छ । बुटवलको अन्तर्राष्ट्रिय सम्मेलन केन्द्र परिसरको खुला चौरमा नेता कार्यकर्ताहरुको खचाखच उपस्थिति रहेको छ ।

एमालेको प्रदेश अधिवेशनमा करिब १० हजार जनाको सहभागिता रहेको छ । प्रथम अधिवेशनको उदघाटन पार्टीका अध्यक्ष एवं पूर्व प्रधानमन्त्री केपी शर्मा ओलीले गरेका छन् ।

केही दिन अघि बुटवलमै भएको ४ दल सम्मिलित समाजवादी मोर्चाले हल भित्र प्रदेशस्तरको सभा गरेको थियो । जसमा मुस्किलले २५ सय जनाको सहभागिता रहेको थियो केही दिन अघि बुटवलमै भएको ४ दल सम्मिलित समाजवादी मोर्चाले हल भित्र प्रदेशस्तरको सभा गरेको थियो । जसमा मुस्किलले २५ सय जनाको सहभागिता रहेको थियो ।

उदघाटन समारोहमा पार्टीका उपाध्यक्षहरु युवराज ज्ञवाली र विष्णुप्रसाद पौडेल, महासचिव शंकर पोख्रेल, उपमहासचिव प्रदीप ज्ञवाली, सचिवहरु गोकर्ण विष्ट, छविलाल विश्वकर्मा एवं प्रदेशका इन्चार्ज पदमा अर्यालका साथै पोलिटब्युरो सदस्यहरु, केन्द्रीय सदस्यहरु, केन्द्रीय आयोगका पदाधिकारी तथा सदस्यहरुको उपस्थिति रहेको छ ।
सम्मेलनका लागि १२ वटै जिल्लाका ८२ हजार ८९५ पार्टी सदस्यहरुबाट छानिएका प्रतिनिधि तथा विभिन्न २३ वटा जनसंगठनहरुबाट छानिएका १ हजार ४ प्रतिनिधिहरु सहित हजरौंको उपस्थितिले एमाले नेताहरु उत्साहित भएका छन् ।

‘एमाले जनआधारित पार्टी हो, प्रतिकूल मौसमका बीच पनि उत्साहजनक जनसहभागिता छ’–एमाले रुपन्देहीका उपसचिव चित्रबहादुर कार्कीले भने ।
अधिवेशनमा रुपन्देहीबाट सबैभन्दा धेरै १ सय ६४ प्रतिनिधि छानिएका छन् भने कम रुकुमपूर्वबाट १२ छानिएका छन् । यसैगरी कपिलवस्तुबाट ७२, दाङबाट १३१, बाँकबाट ५४, बर्दियाबाट ७४, रोल्पाबाट २७, प्युठानबाट ५७, अर्घाखाँचीबाट ८२, गुल्मीबाट १११, पाल्पाबाट ८३ र पश्चिम नवलपरासीबाट ५२ जना प्रतिनिधि छनोट भएका छन् ।
त्यस्तै जनसंगठनबाट ८३ गरी जम्मा १ हजार ४ जना प्रतिनिधि छनोट भएका छन् ।

तस्वीरहरु : टिआर शर्मा