खोज

बुटवल, २६ जेठ।

जुनियर खेलाडीहरुलाई प्रोत्साहन गर्ने उद्देश्यका साथ बुटवलमा जारी यु–१२ लिग क्रिकेट प्रतियोगिता २०८० मा ग्रिन प्लान्ट ईङलिस बोर्डिङ स्कुल र स्टार क्रिकेट एकेडेमी विजयी भएका छन् । बुटवल उपमहानगरपालिका वडा नं ११, प्यारामाउण्ट बोर्डिङ स्कुलको सहयोग तथा बिएमडब्लु वेस्टर्न क्रिकेट एकेडेमीको आयोजनामा विहिबार भएको पहिलो खेलमा ग्रिन प्लान्ट ईङलिस बोर्डिङ स्कुलले एमएसएमटी क्रिकेट एकेडेमीलाई ५९ रन तथा स्टार क्रिकेट एकेडेमीले एभरेष्ट इङलिस बोर्डिङ स्कुललाई १ सय ६६ रनले पराजित गरेको हो ।

देविनगरस्थित खेलमैदानमा भएको पहिलो खेलमा टस जितेर ग्रिन प्लान्टले निर्धारित २५ ओभरमा ८ विकेटको नोक्सानीमा १ सय ५१ रनको लक्ष्य खडा गरेको थियो । उसका लागि अनिस भुषालले ३० बलमा ४१ तथा आयुष पाण्डेले २९ बलमा २७ रन बनाए ।

एमएसएमटी क्रिकेटका सुरजले ३ तथा सत्यनले २ विकेट लिए । मध्यम लक्ष्य पछ्याएको एमएसएमटीका ब्याट्सम्यानहरुले १४ ओभरमा ९१ रनमा समेटियो । उसका लागि गौरवले १९ बलमा ३१ तथा इमरानले २४ बलमा १८ रनबाहेक अन्य ब्याट्सम्यान दोहोरो रन बनाउन सकेनन् । कम स्कोरमा रोक्न ग्रिन प्लान्टका माधवले ३, रजन र रोहित कुवरले समान २–२ बिकेट लिएका थिए । ग्रिन प्लान्टका माधव बन्जाडे म्यान अफ दी म्याच घोषित भए ।

यसैगरी दोस्रो खेलमा स्टार क्रिकेट एकेडेमीले टस जितेर २० ओभरमा ६ विकेटको नोक्सानीमा १ सय ८२ रन बनाए । स्टारका सफल भट्टराईले ४७ बलमा ७३ रन बनाए । यसैगरी आदित्य भट्टराईले १९ बलमा २० तथा समिर ठकुरीले १० बलमा २५ रनको नटआउट पारी खेले । खेलमा एभरेष्टका सिद्धार्थ चौधरी र रुथेम सुवेदीले समान २–२ बिकेट लिए । मध्यम लक्ष्य पछ्याएको एभरेष्टका ५.४ ओभरमा १६ रनमा समेटियो । एभरेष्टका सुशान्त गौतमले ७ बलमा १० बाहेक अन्य ब्याट्सम्यानहरुले दोहोरो रनको योगदान दिन सकेनन् । कम स्कोरमा रोक्न स्टारका आदित्य भट्टराईले ३ ओभरमा १ मेडनसहित १२ रन खर्चेर ५, रोहित क्षेत्रीले २ ओभरमा १ मेडलसहित २ रन खर्चेर ३ तथा कृष्ण पन्थीले २ विकेट लिए ।

प्रतियोगितामा आयोजक वेस्टर्न क्रिकेट एकेडेमी, स्टार क्रिकेट एकेडेमी, तिलोत्तमा क्रिकेट एकेडेमी, एभरेस्ट ईङलिस बोर्डिङ स्कुल, ग्रीन प्लान्ट ईङलिस बोर्डिङ स्कुल, एमएसएमटी क्रिकेट एकेडेमी गरी रुपन्देहीका ६ वटा एकेडेमी र विद्यालयका टिमबिच प्रतिस्पर्धा भैरहेको एकेडेमीका अध्यक्ष भुवन पाण्डेले बताए ।