खोज

बुटवल, १५ जेठ ।

६१ वर्षीय साईक्लिष्ट एचबी बर्मा १६ औ दिनमा महाकालीदेखी मेची पुल पुगेर आफनो यात्रा समापन गरेका छन् । मेची पुलमा उनले नेपालको राष्ट्रिय झण्डा फहराए । मुखको क्यान्सरको उपचार लगत्तै क्यान्सर रोग र साईक्लिङको महत्व बुझाउन उनी यात्रा सम्पन्न गरेका हुन् । समापन कार्यक्रममा कोशी प्रदेशका सासद गोपाल तामाङ, कराँतेका राष्ट्रिय प्रशिक्षक तुलसी महर्जन, कराँतेका प्रशिक्षक अर्जुन लम्साल क्षेत्रीले बर्मालाई सम्मान गरेका थिए ।

कार्यक्रममा बोल्दै सांसद तामाङले मानव स्वस्थ्यको लागि खेलकुदको महत्व रहेको भन्दै रोगसंग लड्न ईच्छाशक्ति र आत्मबल चाहिने बताए । महाकाली–मेची साइकल यात्रामार्फत बर्माले साईकलको महत्व र क्यान्सर विरुद्धको आफनो लडाई पुष्टि गर्न सफल भएको उनको दाबी छ । साइक्लिङ र पर्यटन एक पाटाको सिक्का भएको दाबी गर्दै उनले सरकारबाट स्पष्ट नीति बनाएर अघि बढ्न जरुरी रहेको बताए ।

यात्राबारे बताउँदै बर्माले सोचेभन्दा पनि राम्रो सफलता मिलेको र सबै साईक्लिष्टबाट ठाउँठाउँमा सहयोग पाएको बताए । उनले विभिन्न विद्यालय, चोकचोकमा मानिसहरुलाई दीर्घरोग क्यान्सरको आफ्नो अनुभव सुनाए । गुट्खा सुर्ती, चुरोट जस्ता पदार्थहरु सेवन नगर्न उनले सुझाव दिए ।

कुल १ हजार २ सय किलोमिटर यात्रा पुरा गरेका उनी छिटोभन्दा छिटो राजमार्ग निर्माणमा सरकारलाई ध्यान दिन आग्रह गरे । पर्यटकहरुलाई सडककै कारण धेरै समस्या भएको भन्दै उनले विश्वमा नै नेपाल साहसिक खेल साइक्लिङबाट चिनिन सक्ने सम्भावना रहेको दाबी गरे । उनको एकल साईकल यात्रा वैशाख २८ गते नेपाल–भारत सिमा गड्डाचौकी नाकाको महेन्द्रनगरबाट यात्रा शुरु गरेका थिए । तिलोत्तमा नगरपालिका–४ स्थायी घर भएका बर्माको पहिचान साईकिलेको रुपमा छ । नेपाल प्रहरीमा हवल्दार पदबाट अवकास लिएका उनी पछिल्लो समय साइक्लिङमा सौखिन छन् । उनको यात्रालाई सैनामैना साईकल साथीबाट जर्सी, बुटवल टुडे दैनिक र अनलाईन उनको यात्रामा मिडिया पार्टनर तथा सिद्धार्थ बिजनेश ग्रुप अफ हस्पिटालिटीबाट आफ्नो शाखाहरुमा आतिथ्यता सौजन्य गरेको छ ।