खोज

बुटवल, २५ वैशाख ।

प्रथम बुटवल मेयर कप टि–ट्वान्टी क्रिकेट प्रतियोगिता २०८० अन्तरगत सोमबार भएको खेलमा आयोजक बुटवल उपमहानगरपालिका विजयी भएको छ । बुटवल उपमहानगरपालिकाको आर्थिक सहयोग र बुटवल क्रिकेट विकास समितिको आयोजनामा भएको उद्घाटन खेलमा आयोजक बुटवल उपमहानगरपालिकाले लुम्बिनी सास्कृतिक नगरपालिकालाई ४ विकेटले पराजित गर्दै पहिलो जित निकालेको हो ।

नरेश्वर क्रिकेट मैदानमा भएको खेलमा टस जितेर ब्याटिङ रोज्दै लुम्बिनीले निर्धारित २० ओभरमा सबै विकेट गुमाउदै १ सय २१ रनको लक्ष्य खडा गरेको थियो । लुम्बिनीका जाबेदले ३१ बलमा ३० तथा साउद खानले १८ बलमा २२ रनबाहेक अन्य ब्याट्सम्यान टिक्न सकेनन । बुटवलका हरजित सिहले ४ ओभरमा १७ रन खर्चेर ३ तथा विवस खत्रीले ४ ओभरमा १७ रन खर्चेर २ बिकेट लिए ।

मध्यम लक्ष्य पछ्याएको बुटवलका ब्याट्सम्यानहरु १८ ओभरमा ६ बिकेट गुमाउँदै लक्ष्य भेटायो । बुटवलका प्रज्वल थापाले ४० बलमा ४८, दिपेश रोकाले ११ बलमा २४ र भुवन पाण्डेले १७ बलमा २० रनको योगदान दिए । लुम्बिनीका अहमदले ४ ओभरमा ३१ रन खर्चेर ३, अमर मिश्राले ३ ओभरमा २२ रन खर्चेर १ बिकेट लिएका थिए । खेलमा बुटवलका हरजित सिह म्यान अफ दी म्याचबाट पुरस्कृत भए ।

आईतबार भएको पहिलो दिनको दोस्रो खेलमा तिलोत्तमा नगरपालिका विजयी भएको छ । तिलोत्तमाले देवदहलाई ४७ रनले पराजित गरेको हो । प्रतियोगिताको उपाधि विजेताले नगद ५० हजार रुपैया, कप, मेडल र प्रमाणपत्रबाट पुरस्कृत गरिने समितिका सचिव पुनित पोखरेलले बताए । यसैगरि उपविजेता टिमले नगद २५ हजार रुपैया, मेडल, प्रमाणपत्र, म्यान अफ द सिरिजलाई नगद ५ हजार रुपैया, उत्कृष्ट बलर, ब्याट्सम्यानलाई नगद २ हजार ५ सय रुपैया, कप, प्रमाणपत्रबाट पुरस्कृत गरिने उनले बताए ।