खोज

बुटवल, २४ वैशाख ।

प्रथम बुटवल मेयर कप टि–ट्वान्टी क्रिकेट प्रतियोगिता २०८० मा सैनामैना नगरपालिकाले विजयी शुरुवात गरेको छ । बुटवल उपमहानगरपालिकाको आर्थिक सहयोग र बुटवल क्रिकेट विकास समितिको आयोजनामा आइतबार भएको उद्घाटन खेलमा सैनामैनाले आयोजक बुटवल उपमहानगरपालिकालाई ५ रनले पराजित गर्दै स्पष्ट अंक जोड्न सफल भएको हो ।

नरेश्वर क्रिकेट मैदानमा भएको खेलमा टस जितेर ब्याटिङ रोज्दै सैनामैनाले निर्धारित २० ओभरमा ६ विकेटको नोक्सानीमा १ सय ५३ रनको लक्ष्य खडा गरेको थियो । सैनामैनाका बिक्रम गौतमले २४ बलमा ४६, बसन्त खड्काले २७ बलमा ३१ तथा सुशिल सापकोटाले २३ बलमा २५ रनको योगदान दिएका थिए । बुटवलका अभिषेक गौतमले ४ ओभरमा २८ रन खर्चेर २ तथा सुदन श्रेष्ठले ४ ओभरमा २३ रन खर्चेर समान २ बिकेट लिएका थिए । मध्यम लक्ष्य पछ्याएको बुटवलका ब्याट्सम्यानहरु १९.५ ओभरमा सबै बिकेट गुमाएर १ सय ४८ रनमा समेटियो । बुटवलका बिक्रम भुषालले ३९ बलमा ६६ तथा बिवस खातीले १६ बलमा १८ रनबाहेक अन्य ब्याट्सम्यान जम्न सकेनन् । कम स्कोरमा रोक्न सैनामैनाका अशोक बिकले ४ ओभरमा १३ रन खर्चेर ३, उदय महर्जनले ४ ओभरमा १९ रन खर्चेर २ तथा सुनिल पौडेलले ४ ओभरमा ३० रन खर्चेर २ विकेट लिएका थिए । खेलमा सैनामैनाका अशोक बिक म्यान अफ दी म्याचबाट पुरस्कृत भए ।

एक समारोहका बीच प्रतियोगिताको बुटवल उपमहानगरपालिकाका प्रवक्ता शिव रानाले उद्घाटन गर्दै पालिकास्तरका युवा क्रिकेट खेलाडीहरुलाई प्लेटफर्म दिन यस्ता प्रतियोगिता महत्वपूर्ण हुने बताए । युवा र खेलकुदलाई जोड दिएर बजेट बिनियोजन गरेको बताए । वडास्तरमा खेलकुद गतिविधि उकास्ने गरि पुर्वाधार र प्रतियोगिताहरु आयोजनामा स्थानिय सरोकारवाला संस्थाहरुलाई समन्वय गर्ने काम गरेको उनले बताए । कार्यक्रममा रुपन्देही क्रिकेट संघका कोषाध्यक्ष निरज प्रताप खाड, निर्वतमान अध्यक्ष नेत्र पौडेल, समितिका अध्यक्ष सोहन श्रेष्ठ (अमित), समितिका वरिष्ठ उपाध्यक्ष रोमित बज्राचार्य, उपाध्यक्ष अनिल सेन्चुरीले क्रिकेट खेलको पुर्वाधारमा सरकारको ध्यान जानुपर्ने सुझाव दिए । प्रतियोगितामा बुटवल, तिलोत्तमा, सैनामैना, देवदह, सिद्धार्थनगर, लुम्बिनी सास्कृतिक नगरपालिका गरि ६ टिम उपाधि भिडन्त गर्ने भएका छन् ।

प्रतियोगिता आयोजना गर्न बुटवल उपमहानगरपालिकाले ५ लाख बजेट बिनियोजन गरिएको छ । ४ दिनसम्म चल्ने प्रतियोगितामा ६ लाख ५० हजार खर्च हुने अनुमान रहेको छ । प्रतियोगिताको उपाधि विजेताले नगद ५० हजार रुपैया, कप, मेडल र प्रमाणपत्रबाट पुरस्कृत गरिने समितिका सचिव पुनित पोखरेलले बताए । यसैगरि उपविजेता टिमले नगद २५ हजार रुपैया, मेडल, प्रमाणपत्र, म्यान अफ द सिरिजलाई नगद ५ हजार रुपैया, उत्कृष्ट बलर, ब्याट्सम्यानलाई नगद २ हजार ५ सय रुपैया, कप, प्रमाणपत्रबाट पुरस्कृत गरिने उनले बताए ।