खोज

बुटवल, ३० चैत ।

बुटवलमा सम्पन्न प्रथम लुम्बिनी प्रदेशस्तरीय लनटेनिस प्रतियोगिता २०७९ को उपाधि सन्जय श्रेष्ठले चुमेका छन् । रुपन्देही लन टेनिस संघको आयोजनामा देविनगरस्थित लनटेनिस कोर्टमा विहिबार सम्पन्न मेन्स सिंगलको फाईनलमा श्रेष्ठले अनिल सेन्चुरीलाई ६–३, ६–० को सेटमा पराजित गर्दै उपाधि चुमेका हुन् । यसैगरी मेन्स डबल्सतर्फ गोपाल ज्ञवाली र अनिल सेन्चुरीको जोडी बिजेता बने । फाईनल खेलमा अर्जुन गुरुङ र मनोज नेपालको जोडीलाई ६–२, ६–४ को सेटमा पराजित गर्दै ज्ञवाली र सेन्चुरीको जोडी विजेता बनेको हो ।

एक समारोहका बीच समाजसेवी मृगेन्द्र शेरचन, कान्तिपुर पब्लिकेसनका प्रदेश प्रमुख दिपेन्द्र बडुवाल, सल्लाहकार मनोज कुमार बस्तेत, अर्जुन गुरुङ, उपाध्यक्ष राम बहादुर बिकले विजेता, उपविजेता टिम तथा खेलाडीहरुलाई कप, मेडल वितरण गरेका थिए । चैत २८ देखि ३० गतेसम्म संचालन भएको प्रतियोगिता दुई विधामा दुई दर्जन खेलाडीहरुले भाग लिएका थिए । समाजसेवी मृगेन्द्र शेरचनले पुरस्कार वितरण गर्दै खेलबाट खेलाडीमा अनुशासन विकाससंगै एकता ल्याउने बताए ।

लनटेनिस खेल र खेलाडीको पक्षमा आफू सहयोग गर्न तयार रहेको भन्दै युवाहरुको विकासमा खेलको महत्व रहेको उनले बताए । संघका अध्यक्ष गोपाल ज्ञवालीले काठमाडौं, पोखरापछि बुटवल लनटेनिस खेलको विकास भएको बताए । अन्तर्राष्ट्रियस्तरको लनटेनिस कोर्टको पुर्वाधार विकास गर्ने लक्ष्यसहित आफुहरु अघि बढेको उनले बताए । हाल लनटेनिस कोर्टमा प्रशिक्षकबाट ग्रासरुट खेल विकासका कार्यक्रमहरु गरिदै आएको छ ।