खोज

भैरहवा, २३ चैत ।

लुम्बिनी अन्तर्राष्ट्रिय पीस म्याराथन प्रतियोगितामा नेपाली सेनाका खगेन्द्र भाट प्रथम भएका छन् । प्रदेश खेलकूद परिषद्, लुम्बिनी तथा नेपाल ओलम्पिक कमिटीको संयुक्त आयोजनामा प्रतियोगिता भएको हो । अन्तर्राष्ट्रिय विकास र शान्तिको लागि खेलकूद भन्ने नाराका साथ खेलकूद दिवसको अवसरमा भएको प्रतियोगितामा भाटल तिलौराकोट–लुम्बिनीका दूरीे २ घण्टा ४० मिनेट ५७ सेकेण्डमा पार गरेका थिए । प्रतियोगितामा नेपाल प्रहरीका करण खड्का दोश्रो भए । उनले २ घण्टा ४२ मिनेट ०१ सेकेण्ड मा दूरी पार गरे भने २ घण्टा ४४ मिनेट २५ सेकेण्डमा दूरी पार गर्दै श्रीलंकाली धावक अमिला सानाथ तेश्रो भए । ओलम्पिक कमिटीका महासचिव निलेन्द्रराज श्रेष्ठका अनुसार खेलकूदको माध्यमबाट लुम्बिनीको प्रवद्र्धनमा टेवा पुग्ने लक्ष्यसहित प्रतियोगिता गरिएको हो । प्रतियोगितामा २ सय ७ राष्ट्रका खेलाडी तथा प्रतिनिधिलाई आमन्त्रण गरिएको थियो ।

म्याराथन कपिलवस्तुको तिलौराकोट दरबारबाट बिहिबार बिहान सवा ८ बजे सुरु भई लुम्बिनीको शान्ती दीप रहेको गेट अगाडि पूरा भएको थियो । प्रतियोगितामा ३३ पुरुष धावक सहभागी भएको उनले बताए । यो वर्षको प्रतियोगिता समापनसंगै २ सय ७ राष्ट्रका ओलम्पिक कमिटीलाई अर्को वर्षको प्रतियोगिताका लागि समेत निमन्त्रणा गरिने छ । म्याराथनमा प्रथमले १ लाख, द्वितीय ले ५० हजार र तृतीय हुनेले २५ हजार नगद राशी प्राप्त गरेको लुम्बिनी खेलकूद परिषदका सदस्य सचिव जयप्रकाश भट्टराईले जानकारी दिए ।