खोज

भैरहवा, १२ चैत

नयाँ वर्ष–२०८० को पूर्वसन्ध्यामा भैरहवामा सडक खाना महोत्सव हुने भएको छ । होटल तथा रेष्टुरेन्ट व्यवसायी संगठन, रुपन्देहीले नयाँ वर्षको अवसर पारेर यही चैत ३० गते सडक खाना महोत्सव गर्न लागेको हो । कोरोना महामारी र पछिल्लो समय आर्थिक मन्दीका कारण सिथिल बनेको पर्यटन व्यवसायलाई उकास्न सहयोग पुगोस् भन्ने हेतुले खाना महोत्सव गर्न लागिएको आयोजकले जनाएका छन् ।

आइतबार भैरहवामा पत्रकार सम्मेलन गरी आयोजकले स्थानीय खाना, कलासंस्कृति र पर्यटन प्रवद्र्धन गर्ने उद्देश्यले महोत्सव गर्न लागिएको बताएका छन् । यसअघि खाना महोत्सव सफलतापूर्वक सम्पन्न गरेको संगठनले यसपटक स्वदेशी तथा छिमेकी मुलुक भारतका पर्यटकलाई आकर्षित गर्ने गरी महोत्सव आयोजना गर्न लागेको जनाएको छ ।

संगठनका अध्यक्ष पिताम्बर न्यौपाने (बिष्णु) ले खाना महोत्सवमा स्थानीयदेखि तारे होटलसम्मका खानाका परिकार पस्किने बताए । ‘सडक खाना महोत्सवमा स्थानीय थारु, नेवारी, मगर, गुरुङसँगै साना रेष्टुरेन्ट र ठुला होटलका स्वाद सडकमै लिन पाइने छ’, उनले भने, ‘स्थानीय तथा राष्ट्रिय कलाकारको प्रस्तुती समेत रहेन भएकाले हामीले चैत ३० गते सबै रुपन्देहीबासी, छिमेकी जिल्ला लगायतका आन्तरिक पर्यटकलाई भैरहवा आएर रमाउन आग्रह गर्दछौं ।’

उनले विगतमा जस्तै यस वर्ष पनि खाना महोत्सवलाई निरन्तरता दिई भैरहवालाई गुल्जार बनाउने प्रयास गरिएको बताए । भैरहवास्थित देवकोटा चोकदेखि बसपार्कसम्मको सडकखण्डमा हुने कार्यक्रममा नेपालीसँगै भारतीय पर्यटक अत्यधिक आउने विश्वास आयोजकको छ । ‘नयाँ वर्ष २०८० को अवसरमा खुसियाली साटासाट गर्ने, रमाइलो वातावरण सिर्जना गर्ने र एक छाक पूरै परिवारले सडकमै खाने, सडकमै रमाउने भनेर यो कार्यक्रम आयोजना गरिएको हो’, उनले भने, ‘यस कार्यक्रमबाट कोभिड– १९ ले थला परेको पर्यटन व्यवसाय र विश्व अर्थतन्त्रमा देखा परेको आर्थिक तरलतालाई थोरै भए पनि राहत पुग्ने, पर्यटक बढ्ने र समग्रमा बजार चलायमा बनाउने कार्य गर्दछ भन्ने विश्वास लिइएको छ ।’

सिद्धार्थ सडक खाना महोत्सवले सांस्कृतिक परम्पराको जगेर्ना गर्दै नयाँ वर्षको उत्सव प्रत्येक वर्ष भैरहवामा हुन्छ है भन्ने सन्देशसमेत प्रवाह गर्ने जनाइएको छ । ‘यस्ता खालका कार्यक्रमहरूले भैरहवा क्षेत्रमा आउने पर्यटकहरुलाई बढाउन मद्दत गर्ने छ । साथै हाम्रो सामाजिक र सांस्कृतिक परम्परामा सम्पूर्ण आमसमुदायहरुलाई जोड्ने काम पनि हुनेछ’, न्यौपानेले भने ।

चैत ३० गते बेलुका ५ बजेदेखि राति १२ बजेसम्म संचालन हुने सडक खाना महोत्सवमा मुलुकभरबाट आन्तरिक र बाह्य मुलुकका पनि पर्यटक अत्यधिक आउने विश्वास गरिएको छ । महोत्सव सम्पन्न गर्न करिब २५ लाख रुपैयाँ खर्च लाग्ने अध्यक्ष न्यौपानेले बता । महोत्सवमा ५० हजार बढी दर्शकले अवलोकन गर्ने अपेक्षा आयोजकको छ । एक सय खानाका स्टल रहने महोत्सवले भैरहवालाई पुन्र्उत्थान गर्ने गर्ने अपेक्षा छ ।

पत्रकार सम्मेलनमा बोल्दै सिद्धार्थ उद्योग बाणिज्य संघका अध्यक्ष ठाकुरकुमार श्रेष्ठ, सिद्धार्थ होटल संघका अध्यक्ष चन्द्रप्रकाश श्रेष्ठ, लुम्बिनी होटल संघका अध्यक्ष गोविन्द ज्ञवाली, मदिरा व्यवसायी संघ, भैरहवाका अध्यक्ष केशवराज ज्ञवाली, लुम्बिनी पप्रेस क्लब अध्यक्ष सम्झना शर्मा, संगठनका महासचिव राजेश महत्राले स्थान अभावमा यस्ता महोत्सव गर्न समस्या भइरहेको जनाउँदै स्थानीय, प्रदेश सरकारले ठाउँ व्यवस्थापन गर्नुपर्नेमा जोड दिए । उनीहरुले खाना महोत्सवले भैरहवा क्षेत्रको पर्यटक विकासमा टेवा पुर्याउने विश्वास व्यक्त गरे ।